کیمی ایسه چاقیریش، مراجعت و خیطاب عنوانیله دئییلن سؤزلره " خیطاب" دئییلیر کی، چمله نین او بیری عضولرییله باغلی اولمور و "آرا سؤز" ساییلیر. خیطابلار ترکیب اعتباریله یا ساده/ بیر سؤزدن عبارت / و یا مرکب/ ایکی و یا نئچه سؤزدن عبارت/ اولور.

خیطابلار آشاغیداکی مقاملاردا ایشلنیر:

١- چاقیریش بیلدیرنلر. بونلار مختلیف نطق حصه لریندن عبارت اولور. مثال: آی قیز! عومرونو ایکی قودوقدان اؤترو چوروده جکسن؟/ گ. صباحی/

٢- مراجعت بیلدیرنلر: قومرو، باجیم چمادانلاری آپار./ ع. ولییف/.

٣- خیطاب شخصین اؤز- اؤزونه مراجعتی مقامیندا اولور.مثلا: باخ! کئف بونا دئییرلر- دئدی. /گ. صباحی/

٤- احساسات مقامیندا ایشلننلر: آی قیز آغلینی باشینا ییغ.

۵- احساساتی آرتیرماق اوچون عینی بیر خیطاب نئچه دفعه تکرار اولور:

آیریلارمی کؤنول جاندان آذربایجان، آذربایجان! / وورغون/

بعضا بیر نئچه سؤز، حتی بیر مصرا باشا- باش خیطاب اولور:

هانی بس صاحابین، هانی بس یییه ن؟

بیر باغلی قاییدان سوردوم دئیه، من. / م. شبسترلی/