تبریز دیالکتینین مؤوقعیینی معین ائدن فونتیک خصوصیتلردن بیری ده صامتلرین عوضلنمه سیدیر. صایتلرین عوضلنمه سینده اولدوقو کیمی، بورادادا آذربایجان ادبی دیلینده کی بیر صامتین عوضینه دیالئکتده باشقا بیر صامت ایشلنیر و سؤزده معنا جهتدن ده ییشیکلیک یارانمیر. تبریزلیلرین دانیشیق دیلینده گنیش یاییلمیش د<ت، ک<خ، خ<ح حادثه لری بئله عوضلنمه لردندیر. صامتلرین عوضلنمه سینی بو جور گروپلاشدیرماق اولار:

١. کار صامتلرین جینگیلتیلی صامتله عوضلنمه سی.

٢. جینگیلتیلی صامتلرین کار صامتلرله عوضلنمه سی.

٣. کار صامتلرین کار صامتلرله عوضلنمه سی

٤. جینگیلتیلی صامتلرین جینگیلتیلی صامتلرله عوضلنمه سی.

کار صامتلرین جینگیلتیلی صامتله عوضلنمه سی.

ت< د. "ت" سسینین جینگیلتیلشمه سی حادیثه سی تبریز دیالکتینده گئنیش یاییلمیشدیر. مثلا: توتماق- دوتماخ، دکتر- دؤحدور، آد- آت، کیفده، دفدر... ت< د. عوضلنمه سی آذربایجان دیلی دیالکت و لهجه لرده سؤزون اولینده، اورتاسیندا و سونوندا قیده آلینمیشدیر. لاکن سؤزون اورتاسی اوچون داها چوخ راست گلینیر.

ک<گ. بو عوضلنمه تبریز دیالکتینده سؤز اولینده و اورتاسیندا اؤزونو گؤستریر. مثلا: سکگیز، کئچی- گئچی...

ف< و. بو عوضلنمه یه تبریز دیالکتینده اسواحان -"اصفهان"، قافقاز- قوقاز، سؤزلرینده تصادوف اولونور.