چ<ش. تبریز دیالکتینده چوخ ایشلنن و بو دیالکت اوچون خاراکتریک حساب ائدیلن حادیثه لردن بیریدیر. چ<ش عوضلنمه سی یالنیز سؤز سونوندا مشاهده ائدیلیر. مثلا: هئش، اوچ- اوش، قیلچا- قیش، ساچ- ساش، قوچ- قوش، اؤلچ- اؤش...

خ<ح. بو عوضلنمه تبریز دیالکتینده سؤزون اورتاسیندا و سونوندا صایتلردن سونرا نظره چارپیر. مثلا: آخشام- آحشام، باخماق- باحماخ، اوخشاماق- اوحشاماخ، چوخ- چوح، اکبر- احبر، چیخماق- چیحماخ...

ح (ه)<خ. ح سسینین خ سسی ایله عوضلنمه سینه تبریز دیالئکتینده بیر نئچه سؤزده تصادف ائدیلیر. مثلا: شاه- شاخ، ساباح- ساباخ، حانا- خانا...

ف<پ. بو حادثه تبریز دیالکتینده معین سؤزلرده گؤرمک اولار. مثلا: پیسدیخ، کفگیر- کپگیر، کفن- کپن، ساپ- ساف... بئلیکله ف<پ عوضلنمه سی تبریز دیالئکتینده بیر نئچه سؤزده قیده آلینماسینا باخمایاراق، تصادوفی خاراکتئر داشیمیر. بو تورک دیللریندکی موجود خصوصیتین دیالکتدکی ایزیدیر.

جینگیلتیلی صامتلرین جینگیلتیلی صامتلرله عوضلنمه سی.

ق<غ بو عوضلنمه یه تبریز دیالکتینده سؤزون اولینده و اورتاسیندا تصادف ائدیلیر. مثلا: قربت- غوربت، یالغوز، واغون...

ب<و. تبریز دیالکتینده فونتیک موقعیندن آسیلی اولاراق ب سسی و سسی ایله عوضلنیر. مثلا: خیاوان، کلوه تین، دابان- داوان، اردبیل- اردویل...

گ<ی. بو عوضلنمه یه تبریز دیالئکتینده ایکی صایت اورتاسیندا اؤزونو گؤستریر. مثلا: ایگید- اییید، اگر- ایه، مگر- میه، نگران- نیه ران، بو گون- بویون...

غ<ق . تبریز دیالکتینده گئنیش یاییلمیش خصوصیتلردن بیری ده سؤزون اورتاسیندا سونور "ر" سسیندن سونرا "غ" سسینین ق سسی ایله عوضلنمه سیدیر. مثلا: غارغا- قرقا، یورغون- یورقون، غارغیش- قارقیش...

ی<گ. بو عوضلنمه یه تبریز دیالئکتینده سؤزون اولینده و اورتاسیندا تصادف ائدیلیر. مثلا: یئنه- گینه، جییر، اؤگرشماخ، یوگورماخ...

ج< ژ تبریز دیالکتینده سؤزون اورتاسیندا ایکی صایت و یا صامتله صایت آراسیندا و سؤز سونوندا بیر حجالی سؤزلرده نظره چارپیر. مثلا: گئجه- گئژه، مجبور- مژبور، آج- آژ، اوجاق- اوژاق...

ی<و . بو عوضلنمه تبریز دیالکتینین مهم خصوصیتلریندن بیرینی تشکیل ائدیر. ی<و سس اویغونلوغو سؤزون اورتاسیندا صایتلردن و "ی" سسیندن سونرا اؤزونو گؤستریر. مثلا: گؤورچین، سوووخ، گؤورماخ، یوووردو، شیویت، سووماخ- سویماخ...

و<ی عوضلنمه سی. مثلا: ائو- اؤی، سئوینمک- سؤیونماخ، تؤوله- تویلا، بنوشه- بنؤیشه...