تبریز دیالکتینده تاثیرلیک حال گؤرولن هر هانسی بیر ایشین تاثیر هدفینی بیلدیرمک اوچون اسملرین سونونا –ی، ێ، نی، نێ شکیلچیلرینی علاوه ائتمکله دوزلیر. آتی سوردی بیرباشا بارخانانین یاننا.. بی کاغزی آپار وئر دؤحدوره...

تاثیرلیک حالدا نظره چارپان خصوصیتلردن باشلیجاسی "ی، ێ" شکیلچیسینین باشقا حال شکیلچیلرینین یئرینده ایشلنمه سیدیر. یییه لیک حالدا: بیزیم بوتون اوشاخلارین گؤزلری خسده اولوپ، بو سویی ضره لی وار. یؤنلوک حالدا: بی گون بی اکینچی یئرنی شوخیم ویریردی. چیخیشلیق حالدا: مثلا، بی کندین آدامی وار شهرده، اونی بی ایرمی دانا باغلیر گتریر قوییر شهرده..

یئرلیک حال

یئرلیک حال تبریز دیالکتینده سونو صایت و جینگیلتیلی صامتله بیتن سؤزلره – دا، ده کار صامتله قورتاران سؤزلره ایسه "تا، ته" شکیلچیسینی آرتیرماقلا دوزلیر. مثل:بازاردا، تنوردا، آیاخدا، بوجاختا، اوتاختا... بو دیالئکتده یئرلیک حال یؤنلوک حالی دا عوض ائده بیلیر.کرشدن شاه آبادا کیمین یئرده فرش دؤشه میشدیله...

چیخیشلیق حال.

تبریز دیالئکتینده چیخیشلیق حالین گراماتیک فورماسی – دان، دن یالنیز سونو صایتله و جینگیلتیلی صامتله بیتن سؤزلرده ایشلنیر. دوواردان، شهردن، کاغیزدان...

سونو کار صامتله بیتن سؤزلرده چیخیشلیق حال شکیلچیسی – تان، تن شکلینده اؤزونو گؤستریر. مثلا: بولاختان، دؤلتتن، پادشاهتان..