تبریز دیالکتینده ده خبرلیک کاتگورییاسینا مخصوص گراماتیک واسطه لر دییشمه میشدیر. بونونلا برابر خبرلیک شکیلچیلرینین کیچیک فونتیک دییشیکلییه اوغرامیش بو یا دیگر واریانتی آرتیق ثابتلشمیش، بو دیالکت اوچون اؤزونه مخصوص خصوصیته چئوریلمیشدیر.

بیرینجی شخص تکده (آم، ام، یام، یم،) جعمده ایسه سؤزون سون صایتینین قالین و اینجه لییندن آسیلی اولمایاراق (اوخ، یوخ) شکیلچیلری ایشلنیر. مثل: دؤخدورم، قرده شوخ، میسگروخ، اولادوخ..

خبرلیک کاتگورییاسینین بیرینجی شخص جمعینده دوداقلانمایان سؤز اساسلارینا شکیلچینین دوداقلانان واریانتینین علاوه اولونماسی دیگر دیالئکت و لهجه لرده ده اؤزونو گؤستریر.

ایکینجی شخص تک (سان، سن،) جمع سوز شکیلچیلری ایله ایفاده اولونور. مثل: قوحومسان ، تانیشسوز، خلورچیسوز

هم بیرینجی، همده ایکینجی شخص جمعه عاید اولان نومونه لرده دوداقلانمایان صایتلی سؤز کؤکلرینه (اوخ، یوخ) و سوز شکیلچیلرینین علاوه اولونماسی همین شخصلرده گراماتیک واسطه نین دوداقلانان واریانتینین نسبتا انکشاف ائتدییینی گؤستریر.

اوچونجو شخص تکده – دی، جمعده ایسه – له فورماسی ایشلنیر. مثل: گؤیچحدی، یاخچیدی، چالادی (گؤلمه چه دی)، یوخسیلدیلار، گورمدیلر، دامداردیلار، کیشیدیلر...