اساس نطق حصه لرینین آراسیندا خصوصی یئری اولان عوضلیکله باغلی بیر سیرا مسئله لرین، او جمله دن بو نطق واحدینین قدیم فورمالارینین آشکارا چیخاریلماسیندا دیالئکت و لهجه لر جانلی عابیده حساب اولونور.بو جهتدن تبریز دیالئکتینده ایشلنن عوضلیکلری آراشدیرماق اولدوقجا فایدالیدیر.عوضلییین آشاغیداکی معنا نوعلری وار.

شخص عوضلیکلری.

تبریز دیالئکتینده ایشلنن شخص عوضلیکلری بونلاردیر: من، سن، او، بیز، سیز، اونلار. تبریز دیالئکتینده بیرینجی و ایکینجی شخص عوضلیکلری حاللانارکن ییه لیک حالدا مه:م (منیم)، یؤنلوک حالدا مه: (منه) شکلینده اؤزونو گؤستریر. یعنی "ن" سسی دوشور و یاناشی دوران عینی و مختلف جنسلی صایتلر بیرلشرک بیر اوزون صایت عمله گتیریر.

شخص عوضلیکلرینین یئرلیک و چیخیشلیق حاللاریندا حال شکیلچیلرینین داها چوخ قیسالدیلمیش فورمالاری فعالیت گؤستریر. مثل: مننن، اوننان، سیززه، بیزنن.

بو دیالئکتده شخص عوضلیکلری ایله باغلی اؤزونو گؤسترن ماراقلی خصوصیتلریندن بیری ده بیز و سیز عوضلیکلریندن سونرا "لار، لر" شکیلچیسینین "زر/در" فورماسینین ایشلنمه سیدیر. مثل: سیزدر/سیززر..

تبریز دیالئکتینده بیز عوضلییینین" بیس" فورماسینا دا راست گلمک اولار. مثل: بیس باغا چیحاندا بئشیوز نفر بیر یئردئیدوخ. بیس سننن خا:ش ائلیروخ، قلبیمیزی سیندیرمایاسان...