خبر شکلی

تبریز دیالئکتینده فعلین خبر شکلی بیر سیرا خصوصیتلره مالکدیر. بئله خصوصیتلر داها چوخ فعلین ایندیکی و غیری قطعی گلجک زامانلاریندا مشاهده ائدیلیر.

کئچمیش زامان.

تبریز دیالئکتینده کئچمیش زامانین ایکی نوعو واردیر: شهودی و نقلی کئچمیش زامان. کئچمیش زامانین بو فورمالاری مورفولوژی علامتلرینه گؤره بیر بیریندن فرقلنیر.

شهودی کئچمیش زامان

تبریز دیالئکتینده شهودی کئچمیش زامان فعللره " دی، دێ، دو، دۆ" زامان موافق شخص شکیلچیلری آرتیرماقلا دوزلیر. تبریز دیالئکتینده بیرینجی شخص تکده " دی، دێ، دو، دۆ" زامان و "م" شخص شکیلچیسی ایشلنیر. مثل: آلدیم، ووردوم..

بیرینجی شخص جعمده زامان شکیلچیلرینین ایشلنمه سینده معین سربستلیک نظره چارپیر. مثل: قئیتتوخ، گئتتوخ، وئردوخ، دئدوخ، گلدوخ..

بعضن ایکینجی شخصین تکینده " دو، دۆ"، جعمینده "دو" زامان شکیلچیسی و "ن، ز" شخص شکیلچیلری اؤزونو گؤستریر. مثل: آلدون، باخدون، قئییتردون، قالدوز، دانیشتوز، بؤلدوز..

شهودی کئچمیش زاماندا سونو "ت، خ، ش، چ" صامتلری ایله قورتاران فعللر بیرینجی شخصین جعمینده، ایکینجی شخصده اوچونچو شخصین تکینده "تی، تێ، تو،تۆ" سونو "س" صامتی ایله بیتن فعللر ایسه اوچونجو شخصین تکینده "سی،سێ" شکیلچیلرینی قبول ائدیر. مثل: باختون، قاییتتی، اوشتی، باختیز..

شهودی کئچمیش زامانین "تی، تێ، تو،تۆ" شکیلچیسی ایله افاده اولونماسینا زنجان دیالئکتینده ده ده راست گلمک اولار. مثل: توتتوز، توتتوم، توللار..