لئکسیکا

تبریز دیالئکتینین لغت ترکیبی قدیم و زنگیندیر. بو دیالئکتین لئکسیکاسیندا خالقیمیزین تاریخی کئچمیشی، عادت –عنعنه سی، مشغولیتی، منصوب اولدوغو اراضینین طعبیی جوقرافی شرایطی ایله علاقدار سؤزلر اؤز عکسینی تاپمیشدیر.

معلومدور کی دیالئکت لئکسیکاسی تئرمین یارادیجیلیقینی زنگینلشدیرن اساس منبه لردندیر. بو جهتدن تدقیق ائتدیییمیز دیالئکتده ده اقتسادیاتین و مدنییتین بیر چوخ ساحه لرینه عاید مختلف تئرمینلر فعالیت گؤستریر. دوزدور، بونلارین بیر قسمی هم آذربایجان ادبی دیلینده، هم ده باشقا دیالئکت و لحجه لرده ده ایشلنیر. بونونلا برابر، تبریز دیالئکتینده تئرمین سؤزلره ده تصادف ائدیلیر. همین تئرمینلر اساسن حیوان، بیتکی، قوش، خستلیک، پالتار، یئمک، اوشاق اویون آدلاریندان و مختلف سنتلرله باغلی سؤزلردن عبارتدیر.

تاریخی دؤرلری بیلدیرن سؤزلر

تبریز دیالئکتینین لغت ترکیبینین معین حصه سینی تاریخین مختلف دؤرلرینین ایزلرینی اؤزونده جمع لشدیرن قدیم سؤزلر تشکیل ائدیر. بونلارین آراسیندا طایفا، نسل مفهومو و قوهوملوق مناسبتلرینی بیلدیرن آدلار، کؤهنه حیات طرزی ایله باغلی اولان سؤزلر، کؤهنه ایل، فصیل، آی، گون، وئرگی آدلاری داها چوخ دقتی جلب ائدیر.