کولت. آذ بختيار وهاب زاده نین آنا دیلی شعرینی تقدیم ائدیر:

دیل آچاندا ایلك دفعه « آنا » سؤیله ییریك بیز،

« آنا دیلی » آدلانیر بیزیم ایلك درسلیگیمیز.

ایلك ماهنیمیز لایلانی آنامیز اؤز سودویله

ایچیریر روحوموزا بو دیلده گیله - گیله.

بو دیل بیزیم روحوموز، عشقیمیز، جانیمیزدیر،

بو دیل بیر- بیریمیزله عهد و پیمانیمیزدیر.

بو دیل تانیتمیش بیزه بو دونیادا هر شئیی،

بو دیل اجدادیمیزین بیزه میراث وئردیگی

قیمتلی خزینه دیر…اونو گؤزلریمیز تك

قورویوب، نسیللره بیز ده هدیه وئرك.

بیزیم اوجا داغلارین سونسوز عظمتیندن،

یاتاغینا سیغمایان چایلارین حیدتیندن،

بو تورپاقدان، بو یئردن،

ائلین باغریندان قوپان یانیقلی نغمه لردن،

گوللرین رنگلریندن، چیچكلرین ایگیندن،

میل دوزونون، موغانین سونسوز گئنیشلیگیندن،

آغ ساچلی بابالارین عقلیندن، كامالیندان،

دوشمن اوستونه جومان او قیراتین نالیندان

قوپان سسدن یاراندین.

سن خالقیمین آلدیغی ایلك نفسدن یاراندین.

آنا دیلیم، سنده دیر خالقین عقلی، حیكمتی،

عرب اوغلو مجنونون دردی سنده دیل آچمیش.

اوركلره یول آچان فضولی نین صنعتی،

ائی دیلیم، قودرتینله دونیالارا یول آچمیش.

سنده منیم خالقیمین قهرمانلیقلا دولو

تاریخی واراقلانیر،

سنده نئچه مین ایللیك منیم مدنیتیم،

شان- شؤهرتیم ساخلانیر.

منیم آدیم- سانیمسان،

ناموسوم، ویجدانیمسان!

بو دیل تانیتمیش بیزه بو دونیادا هر شئیی،

بو دیل اجدادیمیزین بیزه قویوب گئتدیگی

ان قییمتلی میراثدیر، اونو گؤزلریمیز تك

قورویوب، نسیللره بیز ده هدیه وئرك!

ائی اؤز دوغما دیلینده دانیشماغی عار بیلن

فاسونلو اده بازلار،

قلبینیزی اوخشامیر قوشمالار، تئللی سازلار.بونلار قوی منیم اولسون،

آنجاق وطن چؤرگی،

بیر ده آنا اورگی

سیزلره غنیم اولسون.