دیلیمیزده مرکب فعللرده بؤیوک اهمیته مالیکدیر. بو فعللر حیاتین طلبی و دیلین طبیعی انکشافیله علاقه داردیر. دیلیمیزده بیر اسمله بیر فعلدن عمله گلنن مرکب فعللر اولدوقجا چوخدور. بو جهتدن دیلیمیز دنیانین زنگین دیللریندن بیریدیر. مثلا: توتماق فعلیندن: باش توتدو- ال توتدو- یئر توتدو- شاهید توتدو- خسته لیک توتدو- الدن توتدو- دیله توتدو...

دیلیمیزده مرکب فعللر دؤرد نوعدور:

١.- ایدی- ایمیش : /دی- میش/
بو گون دیلیمیزده اولمایان "ایمک" فعلیندن قالان بو کمکچی فعللر، فعلین امر و ماضی مطلق/ شهودی کئچمیش/ دن باشقا بوتون فورمالاری ایله ایشلنیب مرکب فعللر یارادیر. مثلا: یازمیش ایدیم- گلمیش ایدیک- گله سی ایدیک- گلمیش ایمیش..
٢. اول- ائت- ائله
بو قسما مستقل اولان فعللر، کمکچی فعل کیمی اکثر آلینما اسم و بعضا صفتلردن سونرا گلیب مرکب فعللر یارادیر. مثال: حاضیر اول- امر ائت
٣. بیل: فعلین باجاریق فورماسی آدلانان "بیل" واسطه سیله دوزه لن مرکب فعللر. مثلا: یازا بیلدیم- یازا بیلرمیشم...
٤. اسم+ فعل: اسم و فعلدن یارانان مرکب فعللری اوچ قسمه آییرماق اولار:
الف) آدلیق حالدا اولان اسملرله دوزه لن مرکب فعللر.مثال: ال چکمک، باش وورماق، قولاق آسماق، دیل تؤکمک
ب) یؤنلوک حالدا اولان اسملرله دوزه لن مرکب فعللر: باشا دوشمک، اله سالماق، دیله توتماق، گؤزه گلمک..
ج) چیخیشلیق حالدا اولان اسملرله دوزه لن مرکب فعللر. مثال: گؤزدن سالماق، الدن دوشمک، گؤزدن دوشمک..
د) نادیر حاللاردا یئرلیک حالدا اولان اسملر ده مرکب فعللر دوزه لیر. مثال: گؤزده- قولاقدا اولماق...