آنا صحیفه آنا دیلی |
هر بیر میللتین وارلیغینین موهوم عامللریندن بیری اولان آنا دیلی هئچ واخت یاددان چیخمایان، اونودولمایان قورور منبعیدیر. تاریخ بویو باشی بلالار چکمیش آذربایجان خالقی زامان–زامان ازیلسه، رپرسییالارا معروض قالسا دا اؤز آنا دیلینی `قورویوب ساخلایا بیلدی و تاریخین معین دؤنهمینده بؤیوک قورور حسی ایله سؤیلهدی:
یاددان چیخماز آنا دیلیم
دوغرانسام دا دیلیم–دیلیم…
دیل – روحانیلیین ایفادهسیدیر، بو سببدن ده او، زاماندان، گئرچکلیکدن، قورولوشدان اوستوندور. اگر دیل اجتماعی حادثه اولسایدی، چوخسایلی قورولوشلارلا بیرگه دیلیمیز ده اؤلوب گئدردی.
هر بیر خالق اؤز آدییلا باغلی اولان دیلین یارادیجیسی، یاشادیجیسی، قورویوجوسودور.
***
یازار خالقینی تمهنناسیز سئودیی، اونا روحهن قوووشدوغو درجهده گؤزل اثرلر یارادا بیلر. یازار روحلو، ایناملیدیرسا، اثری ده گؤزل اولاجاق.
***
یازیچینین یارادیجی موستقیللیگی منسوب اولدوغو خالقدان آسیلی اولمالی، او، خالق قارشیسیندا مسولیتینی اونوتمامالیدیر.
***
یازارلار باجاردیقجا آنا دیلیمیزده یئنی سؤزلر یاراتمالیدیرلار.
اؤز دیلینین تعصوبونو چکمهیهن یازیچی ماهیتجه آنتیمیللیدیر.
اؤزونو آذربایجان یازیچیسی، شاعری سایان تورکجهمیزی اینجهلیکلرینه کیمی بیلملیدیرلر. بونون بیر یولو دا فولکلورا دریندن ییهلهنمکدیر. چونکی خالقین فولکلور دیلی قدر دورو، آنلاشیقلی دیلی یوخدور.
***
میللی دیر اؤلچوسو اولمایان، همین دیر اساسیندا یاشامایان یارادیجینین اثری ده میللیلییه قارشی چئوریلیر.
یازیچی خالقینین آدیندان دانیشدیغینا، یازدیغینا امین اولمالیدیر.
یازیچی ایله خالق بیر-بیرینه منسوب اولمالیدیر.
اؤزگه دیلده یازیب اؤزونو خالقدان (تورکدن) سایماق – سوچدور.
یارادیجیلیغییلا بیر میللته، میللی منسوبیتی ایله باشقا بیر میللته مخصوص اولماق – اؤزوملویو، معینلیگی ایتیرمکدیر، اؤز میللتینی شوبهه آلتینا قویماقدیر.
یازیچینین دیلی اونون منسوب اولدوغو میللتین دیلی اولمالیدیر.
***
هر کسین آنا دیلی (بونا «دوغما دیل»، «میللی دیل» ده دئیه بیلریک) – منسوب اولدوغو میللتین دیلیدیر.
***
منسوب اولدوغو میللتین دیلیندن باشقا اینسانین دوشوندویو، داخیلی نیطقینی قوردوغو، اونسیت یاراتدیدغی دیلی – آنا دیلی سایماق یانلیشدیر. دونیادا آنا دیلینه بئله یاناشانلار دا چوخالماقدادیر.
***
آنا دیلی بیردیر. چونکی آدامین بیر آناسی (آتاسی، میللتی) اولور.
آنا دیلی – میللی دیلدیر، شخصین منسوب اولدوغو میللتین دیلیدیر.
تاریخ
2019.02.12 / 20:06
|
مولف
آینورا مممدووا
|