آنا صحیفه آنا دیلی |
ایراندا شیعهلیک عمومیدیر، تاریخ کئچمیشینین عمومی جهتلری وار، کولتورده ده بعضی عمومیلیکلر وار، اما ان بؤیوک فرق آنا دیلیندهدیر.
Axar.az خبر وئریر کی، بو سؤزلری آنکارا اونیورسیتتی معلمی نصیب نصیبلی موصاحیبهلرینین بیرینده دئییب. او، آنا دیلی اوغروندا موباریزهنین هر ایکی طرفده میللیشهمهنین اساس ایستیقامتی اولدوغونو بیلدیریب.
«آنا دیلی اوغروندا موباریزه هر ایکی طرفده میللتلشمهنین اساس ایستیقامتلریندن بیری اولوب. ۱۹-جو یوزیلده قوزئی آذربایجاندا دایم آنا دیلینده تحصیل دئمیشلر، دایم آنا دیلینین رسمی ایستاتوسا صاحب اولماسینی طلب ائتمیشلر... بو گون میللتلشمه پروسئسی گونئی آذربایجاندا دا خئیلی واختدیر آیاق آچیب و ایرلیلهییب. اؤزللیکله ۱۹۹۱-دن سونرا سرعتله اینکیشاف ائدیب. سون دؤورلرین حادثهلرینی، شعارلارینی گؤز اؤنونه آلساق، گؤرریک کی، اساس شعارلاردا آنا دیلینه رسمی ایستاتوس وئریلمهسی طلبی وار و مرکزی مؤقعدهدیر.»
نصیب نصیبلی ایران آذربایجانیندا جریان ائدن میللی حرکاتدا آنا دیلی مسئلهسینین مرکزده دوردوغونون سببلرینی ده دیرلندیریر:
«گونئی آذربایجانا قارشی آسیمیلیاسییا سیاستی دیل اوزرینده اولدو. یعنی ایراندا شیعهلیک عمومیدیر، تاریخ کئچمیشینین عمومی جهتلری وار، کولتورده ده بعضی عمومیلیکلر وار، اما ان بؤیوک فرق آنا دیلیندهدیر. البته کی، قوزئی آذربایجاندا دا دیلله باغلی موباریزه اولوب و بو گون بئله بیز اونون داوامینی گؤروروک. اما گونئی آذربایجاندا بو مسئله چوخ جدی قویولور و دوغرو اولاراق [میللتلشمه] دیلین اوزرینده گئدیر. محض بونا گؤره ده گؤروروک کی، هم شاه، هم ایسلام رژیمی آسیمیلیاسییا سیاستینی دیل اوزریندن یوروتدو. اما بو سیاست عمومیتله ایفلاس ائتدی،» دئیه او بیان ائدیر.
«آذربایجان میللی حرکاتی هدفلرینی دوغرو معین ائتدی. دیل مسئلهسی مرکزده دوردو. عینی زاماندا ان بؤیوک تضییق ده دیلین اوزرینده اولدو. دونیانین چوخ آز یئرینده بئله نمونهیه راست گلمک اولار کی، ۲۱-جی عصرده ۳۰ میلیونلوق، اؤلکه اهالیسینین تخمیناً ۴۰ فایزینی تشکیل ائدن بیر اتنوسون دیلی قاداغان اولونور،»
تاریخ
2019.02.21 / 12:30
|
مولف
آیتاج آراز
|