دیلیمیزده ائله فعل نوعو ده واردیر کی، اوندا ایش بیر نفرین امری، خواهشی، مصلحتی و یا تدبیری ایله ایکینجی و یا ایکینجی شخصین یولو ایله اوچونجو شخص طرفیندن اجرا اولور.

بئله فعللره اخبار نوعو دئییلیر. بو فعللر یالنیز تاثیرلی فعللردن دوزه لیر و تاثیرلی ده قالیر، اخبار نوعو فعللرینی دوزلتمک اوچون همان شکیلچیلردن استفاده اولونور کی، تاثیرسیز فعللردن تاثیرلی فعللر دوزلدنده استفاده اولونور.مثلا: اوخشا- اوخشات- اوخشاتدیر، اوخو- اوخوت- اوخوتدور..

قید اولونمالیدیر کی، "بیلدیرمک" فعلی اخبار نوعو اولماسا دا، ایشین ایکینجی و اوچونجو ایجراچیسی اولماسا دا، اونون "بیلمک" فعلیندن فرقی واردیر. بو فرق اوندان عبارتدیر کی، "بیلمک" فعلی "یالنیز "نه یی؟" سوالینا جواب وئردییی حالدا، "بیلدیرمک" فعلی هم "نه یی؟" همده "کیمه؟" سوالینا جواب وئریر.

بیلدیردیم. نه‌یی؟- سیری، بیلدیردیم کیمه؟ دوستوما..

دئمک اجبار نوعو شکیلچیسی قبول ائتمیش "بیلدیرمک" فعلی فاعل، مستقیم تماملیق و غیر مستقیم تماملیق طلب ائدیر، لاکن او فعل ایکینجی ایش گؤرن ایستمیر، یعنی اوندا اجبار نوعو آنلاییشی یوخدور. لاکن مثلا"یازدیرماق" /یازدیردیم/ فعلینده یوخاریداکی آنلاییشلاردان علاوه ایکینجی ایش گؤرن ده واردیر ، یعنی فعلی اجبار نوعوندندیر. "یازدیردیم" فعلی نلر بیلدیریر؟ بو فعلده بو آنلاییشلار واردیر:
١. ایشی گؤرن /فاعیل/ کیم یازدیردی؟ من یازدیردیم

٢. مستقیم تماملیق. نه یی؟ یازدیردیم؟ مکتوبو یازدیردیم.

٣. غیر مستقیم تماملیق. کیمه؟. کیمه یازدیردیم؟ آتاما یازدیردیم. /گؤندردیم/

٤. ایکینجی غیر مستقیم تماملیق و یا اصل ایش گؤرن، اصل فاعل کی، "کیمه" سوالینا جواب وئریر. مکتوبو دوستوما یازدیردیم، یعنی دوستومو مجبور ائتدیم کی، مکتوبومو یازسین.