فعلین بو شکلینده ایشین اجرا اولونماسی آیری بیر ایشین ایجراسینا باغلی اولور. باشقا سؤزله دئسک، بیر ایشین ایجراسی آیری بیر ایشین ایجراسینا شرط اولور. شرط شکلینده زامان علامتی اولمور، لاکن اونلار معمولا گلجک زامانی بیلدیرن بیر فعل ایله ایشلنیر و اونا گؤره ده ساده شکلی گلجک مفهومونا مالیک اولور. مثلا: اگر گئتسم دئیه جیم.

شرط شکلینین علامتی "سا-سه" دیر کی، مختلف فعللرده مختلف یئرلرده ایشله نیر. بونونلا برابر دیلیمیزده شرط فعللرینین اولینده "اگر" کلمه سینی ایشلتمک اولار شرط شکلی ایکی جور اولور:

١- ساده شرط شکلی: بو شکیلده اولجه فعلین کؤکو، سونرا شرط شکیلچیسی و نهایت بیتیشن شخص عوضلیکلری گلیر. مثلا: آچسام، آچماسانیز... شرطین بو شکلی، زامان علامتی اولماسادا، گلجه یی بیلدیریر.

٢- مرکب شرط شکلی: شرطین بو شکلی "ایدی" دن عبارتدیر کی، اساس شرط شکیلچیسی "سا-سه" دن سونرا گلیر، اؤزوده هم کامل، همده اختصارلا یازیلیر و کئچمیش زامانی بیلدیریر. مثلا: آچساایدیم= آچسایدیم، گؤرسه ایدین= گؤرسه یدین..

اینکاری همان "ما-مه" دیر کی، کؤکدن سونرا گلیر. مثلا: آچماسا ایدیم- آچماسایدیم.... بو شرط فورمو حکایه مضمونو یارادیر.
مرکب شرطین ایکینجی فورمو "ایمیش" کؤمکچی فعلیله دوزه لیرکی، هم شرط، هم روایت=غیر شهودیلیک همده کئچمیش زامانی بیلدیریر. بو شکیلده ده شرط علامتی "سا-سه" بلاواسطه کؤکه قوشولور، اوزوده هم تام، همده قیسا شکیلده ایشله نیر.

بو دئدیکلریمیزدن نتیجه چیخارداراق دئیه بیلریک کی:

١- "سا- سه" شکیلچیلری اشتراک ائدن و "ایدی-ایمیش" کؤمکچی فعللری اشتراک ائتمه ین فعللر قورولوشجا شرطین ساده سی اولور و زامانجا/ اگر باشقا زامان شکیلچیلری اولماسا/ گلجه یی بیلدیریر.

٢- "سا- سه" شکیلچیلریندن سونرا "ایدی " کؤمکچی فعلی گلرسه، فعل قورولوشجا شرط فورمونون مرکبی، مضمونجا ایسه شرطین حکایه سی، زامانجا ایسه کئچمیش حساب ائدیلیر.

٣- "سا- سه" شکیلچیلریندن سونرا "ایمیش " کؤمکچی فعلی گلرسه، فعل قورولوشجا شرط فورمونون مرکبی، مضمونجا ایسه شرطین روایتی، زامانجا ایسه کئچمیش حساب ائدیلیر.

٤- "سا- سه" کؤمکچی فعلی اسملره ده قوشولاراق اسمی جمله لرده شرط بیلدیریر. مثال: باهارسادا، بیزده قیشدیر، سویوقدور...