یاشار ایتینی ائو ده ساخلاییر.
آراز ایتینی باغ دا ساخلاییر.
سنین کیتابین من ده دئییل.

بو جمله‌لرده " ده، دا" اَک اولدوغونا گؤره اؤزوندن اؤنجه‌کی سؤزجوکله یاپیشیقلی یازیلیر، بئله اولمالی‌دیرلار:

ائوده ، باغدا، منده

رقیه کبیری‌نین اوچونجو رومانی‌دا یاییملاندی.

منده ادبیاتی سئویرم.

منی سئومه‌سنده من سنی سئویرم.

هله‌ده اونون حسرتینده‌دیر.

یاشار یئنه‌ده ائوه گلدی.

...بیرده بونو دئمک ایسته‌ییردیم...

بو جمله‌لرده "ده، دا" باغلاج اولدوغونا گؤره (فارسجادا هم آنلامی) اؤنجه‌کی سؤزجوکدن آیری یازیلمالی‌دیر:

رومانی دا، من ده ، سئومه‌سن ده، هله ده، یئنه ده، بیر ده.

دیلیمیزده ایکی تور "ده، دا" واردیر. بیری باغلاج اولاندیر، اؤزوندن اؤنجه‌کی سؤزجویه یاپیشماز، او بیریسی اَک اولاندیر، اؤزوندن اؤنجه‌کی سؤزجوکله یاپیشیقلی یازیلمالی‌دیر.

...اونون هر ایشینه گؤزیومدوم.

"گؤز یومماق" بیر دئییم‌ اولاراق بو جمله‌ده، اؤنم وئرمه‌مک، فیکیر وئرمه‌مک آنلامیندادیر. دئییمی اولوشدوران سؤزجوکلر آیری آیری یازیلمالی‌دیر:
گؤز یومدوم

ایکی‌له‌مه‌لر ده آیری یازیلیر:
آددیم آددیم، آغیر آغیر، یاواش یاواش، گئده گئده ...
اوشاق موشاق، قاپی ماپی، زیر زیبیل ‌‌...

دیز دیزه، آغیز آغیزا، ایچ ایچه، گوندن گونه، تکه توک، باشا باش ..‌.

یاشارین الینده کی کیتاب، غفور یازدیغی اؤیکو توپلوسودو.

بو جمله‌ده "کی" اَک اولدوغونا گؤره اؤزوندن اؤنجه‌کی سؤزجویه یاپیشیقلی یازیلمالی‌دیر: الینده‌کی

یاشارین آیاقی کئییمیشدی;

اونو گؤرنده آیاقی یئره میخلاند;

...اوتاقی سیلیب سوپوردو.

بو جمله‌لرده " آیاقی" و "اوتاقی" سؤزجوکلرینده‌کی "ق" حرفی "غ" اولمالی‌دیر. دیلیمیزده "ق" ایکی سسلی حرفین اورتاسیندا گلنده یوموشالیب "غ" حرفینه دؤنر.
یاتاق، یاتاغی، یاتاغیندا...

دالاق، دالاغی ...

اوتاق...

قاچاق، قاچاغی، قاچاغان...

یازدیق، یازدیغی، یازاجاغیمیز

باشماق، باشماغی، باشماقلار ...

یاشماق، یاشماغی...

تورکجه‌ده سسلی حرفلر:

آ a ، ائ e، اَ ə، او o، او u، او ü، اؤ ö، ای i، ای ı.