آذربایجانلی شاعر، یازی‌چی و خالق قهرمانی مرضیه احمدی اسکویی ۱۹۴۵-جی ایلده تبریز یاخینلیغیندا یئرلشن اسکوده آنادان اولوب.

اورتا مکتبی بیتیردیکدن سونرا تبریزده، داها سونرا تهران اونیورسیتتینده تحصیل آلیب.
۱۹۷۰-جی ایلده طلبه‌لرین اعتراض آکسییالارینین تشکیلینده فعال رول اویناییب. بونا گؤره ده ساواک مأمورلاری طرفیندن تعقیبلره معروض قالیب و ۱۹۷۴-جو ایلده ساواک مأمورلاری ایله سلاحلی توققوشمالار زامانی هلاک اولوب.
تأسف کی، مرزییه‌نین فارسجا و تورکجه اولان اثرلری هله ده توپلو شکلینده چاپ ائدیلمه‌ییب.
کولت.آذ مرضیه احمدینین شئیرینی تقدیم ائدیر:

خیرداجا، اینجه آرخدیم
مئشه‌لردن، داغلاردان
دره‌لردن آخیردیم؛
بیلیردیم دورغون سولار
اؤز ایچین‌ده بوغولار،
بیلیردیم دریالاردا
دالغالار قوجاغین‌دا
خیرداجا آرخلار اوچون
یئنی حیات دوغولار؛
نه یولون اوزاق‌لیغی،
نه قاران‌لیق چوخورلار،
نه دورغونلوق هوه‌سی
منی یول‌دان قویمادی؛
ایندی قاریشمیشام من
قورتولماز دالغالارا؛
وارلیغیمیز چالیشماق
یوخلوغوموز دایانماق.