کیمسه‌سیزلیکدن گئچیب آرتیق!

آنلامیر ماساداکی کاکتوس اؤلوم ساچدیغینی اوتاغیمین قوجاغینا

آنلاشیلمایان ندیر آنلامیرام!

دئییلمی‌قوش قووان‌لار قوشلارین گونوسودور؟

دئییل می‌شعر ده سارا بیلمین یارالار وار

عقربه‌لرین یادداشیندا

یالان یالقیزلیق قورخوسودور مثلا

اؤلمه‌یه جسارت ائتمه‌دییمیز آنلار

قورخوروقسا قانادلانماسیندان کپنک‌لرین

هر شئ اولا بیلر دئییر بئینیمده‌کی سورگون او سس‌لر

اوچماق گلیرسه ایچیندن آتلا

دیزلرینین ان اوجا قامتیندن

ییخیلماق اوچماغین قورخاق آدیدیر.

قورخما دئییر ایچمدن آتلا

سای گئری سئودیکلرینی،

تاپشیر آدلارینی‌هاوادا اسن یالقیزلیغا

تاپشیر یئل قووانلارا پوفله اؤلومونون گؤزونه…

یوکسل قانادلاریندا قارانقوشلارین.

هر کسین ایچینده کؤچمک ایسته‌ین قارانقوشلار وار.

اؤزونو قارانقوشلارا آدا

آپاراجاق سنی چیچک‌لرین گولدویو یئره،

بالیق‌قولاق‌لارینین اوچدوغو

اوچوروم‌لارین یاشاما چاتدیغی قایالارا

عشق ده کلمه‌لردن عبارت‌دیر بوردا

عؤمور بویو گؤزلرینی یاوان یئیه بیلرم مثلا

سونراایسه اؤلوم

اوز دؤندره بیلمک‌دیر اللرینسیز

سسنسیز

قوجاغینسیز

جیسمین بویدا بیر بویوتو ایشغال ائتمکدن

اؤلومونو یاشا!