کولت. آذ گونی‌لی شاعر اومید نجارینین «معلمیم پروفسور عدالت طاهیرزاده‌یه مکتوب» آدلی شعیرینی تقدیم ائدیر:

گؤزوموز آیدین، اوستاد!
اونیورسیتت‌ده‌کی پیلله‌لرله سئوگیلی اولدوق.
قیرخ بش میلیون آیاغیمدیر بو پیلله‌لرده،
دوشوندوکجه قیرخ بئش یاش قوجالیرام...
بیلکلریم‌ده‌کی بیلرزیکلرین جوابینی سوروشماغا گلدیم.
...کورییم‌ده‌کی یارالار یئنه آغریدیر، اوستاد.
قامچیلاری کس کی، کئچمه‌سین اینسانلیق فننینی،
کئچمه‌سین یوخولاریمدان ایشگنجه قطاری...
نئچنجی کورس‌دا کئچجییک آغری فننینی،
گؤرجییک تبریزین ارکینی؟!
...داها کسیلمه‌یه جانیم دا یوخدور
دیلیم کسیک-کسیکدیر، اوستاد!
ده، گئت‌سین یوخولاریمدان
یئنه او کیشی منی گؤزوباغلی سوراغلاییر.
اونون چینینه تاخیلان اولدوزلار گئجه‌لریمی قارالدیر...
یوخولاریمدا قارانلیق اوطاق،
قارانلیق اوطاقداسا یئنه اؤزومو گؤرورم،
یئنه پنجرلر دارالیر دیوارلارین قوجاغیندا...

داها دیلیم دانیشمیر گئرچکلری،
بیلکلریم سیخیلیر.
اوتانیرام دیلیمدن...
آدیم اومیددیر، یوخسا اومود؟!
اؤیرتسن ده
ایچیمده اومود مزارلیغی وار.
طلبه بیلطیمین گؤزلرینی باغلاییب گوللدیلر،
آسدیلار بیوگرافییامی،
بلکه یورولسون آیاقلاریم،
سؤز تاپا بیلمه‌یم یازماغا...
صمد عمینین مزاری اوسته کیتابیمین
نئجه کپه‌نه‌یه دؤندویونو سوروشما!
اؤزوم بوردا اولسام دا، کؤلگمی باسدیردیم امامییه قبیریستانیندا.

گؤزوموز آیدین، اوستاد!
اونیورسیتتده‌کی پیلله‌لرله سئوگیلی اولدوق...
گونده دانیشیرام عذابلاریمی پیلله‌لره.
پیلله‌لری چیخارکن اؤزومدن چیخیرام،
آخی آغیرلیغیم بویدا داشام بو یاشیمدا.
ایکی قول آراسیندا وطنداشام، اوستاد!
سؤزلریم زینداندا قوجالیر...
آناما گؤره بوتون شعیرلریمین قانادلاری باغلیدیر...