آشیق عباس توفارقانلی ۱۶-جی عصر آذربایجان آشیغیدیر. شعیرلرینده "قول"، "شیکسته"، "بیکس" تخلصلرینی ایشله‌دن عباس توفارقانلی ۱۶-جی عصرین سونلاری - ۱۷-جی عصرین اوللرینده گونئی آذربایجاندا یاشاییب یاراتمیش گؤرکه‌ملی شاعر-آشیقلارداندیر. اونون آدییلا باغلی اولان "عباس-گولگز" داستانی دا آذربایجان فولکلورونون قیمتلی اؤرنکلریندن‌دیر:

کولت. آذ آشیق عباس توفارقانلینین "بینمز" ردیفلی شعیرینی تقدیم ائدیر:

آی حضرات، بیر زامانا گلیب‌دیر،
آلا قارغا شوخ ترلانی بینمز.
اوغوللار آتانی، قیزلار آنانی،
گلینلر دا قاینانانی بینمز.

آدام وار کی، گئتمه‌یه‌سن ایشینه،
آدام وار کی، دولاناسان باشینا،
آدام وار کی، آیران تاپمیر آشینا،
دیندیررسن، یاغلی نانی بینمز.

آدام وار، داغلاری گزر سرسری،
آدام وار، گئیینر پوستینن دری،
آدام وار، معرفتدن یوخدور خبری،
آدام وار، سلطانی، خانی بینمز.

آدام وار، دولانار صحرانی، دوزو،
آدام وار، دؤشورر گولو-نرگیزی،
آدام وار، گئیمه‌یه تاپامماز بئزی،
آدام وار، آل گئیر، شالی بینمز.

آدام وار، چوخ ایشلر ائیلر ایرادا،
آدام وار کی، یئته بیلمز مورادا،
آدام وار کی، چؤرک تاپماز دونیادا،
آدام وار، یاغ یئیر، بالی بینمز.

آدام وار کی، آداملارین ناخشیدی،
آدام وار کی، آنلامازدی، ناشیدی،
آدام وار کی، حیوان اوندان یاخشیدی،
دیندیررسن، هئچ اینسانی بینمز.

آدام وار دستینه وئررسن گوللر،
آدام وار، گؤزونه چکه‌سن میللر،
توفارقانلی عباس، باشینا کوللر،
نه گونه قالمیسان، قاری بینمز.