کولت. آذ گنج شاعر شهریار دلگرانینین سایتلاردا یاییملانمایان شعیرینی تقدیم ائدیر.

اوزاقلار سنه آپارار
بو حزونلو گئجه‌ده
بوتون اوزونتولری.
دومان چؤکموش تپه‌لرده
قارغالار هارای سالار،
هئچ قویماز کی داریخماغا
اوشوین قبیرلری...

سن هارداسان؟
هانسی یئرین اوستونده‌سن؟
بیلمیرم.
منی اونوتدونسا، دئمک
دنیزی ده اونوتدون.
سن هارداسان؟
هانسی کوچه
هارا آپاریب سنی؟
گئتمی‌سنسه، یئر اوزونده سعادت بیتیب دئمک...

قاییت،
قوخلا گولومسین باهاری کؤرپه‌لری،
بوتون داریخماقلاریما سنین آدینی قویدوم.
قاییت بیر یول ائویمیزی-ائشیمیزی سئویندیر،
قاییت نیمداش آغریلاری، بیرتهر ائت، اوووندور...

پاره-پاره اولوب سینم، نوولا، گؤتور پاره‌نی،
گؤینییندن تانیییرام سن ووردوغون یاره‌نی،
قوللاریم سنه قالخیب ای... ائندیر بو میناره‌نی،
کولکلرین ایسلاندیغی یاغیشلاردا قاییت گل،
آدام کیمی سئومدیک کی، باجاراق اونوتماغی...

گئدنلر ده ترگیزیبلر بیریوللوق قاییتماغی،
هئچ یوخ ایمیش آداملارین سن بیلدیین اللهی.
بده‌نیم ده یادیرغاییب اؤپوب-قوجاقلاماغی،
قوللاریمی اؤیردیرم ایندی قوجاق آچماغا...

گؤره‌ن منه نیه بیر جوت آیاق وئردین، ایلاهی؟
تک آیاق دا بس ائدرمیش اؤز ایچیمدن قاچماغا...

اوزاقلار سنه آپارار
بو حزونلو گئجه‌ده
بوتون اوزونتولری.
دومان چؤکموش تپه‌لرده
قارغالار هارای سالار،
هئچ قویماز کی داریخماغا
اوشوین قبیرلری...