کولت. آذ آذربایجانین سئویلن شاعری نصرت کسمنلینین "بیری واردی، بیری یوخ" شعیرینی تقدیم ائدیر.

اولان اولوب، کئچن کئچیب بلکه ده،
ایندی داها کؤورلمیین یئری یوخ.
عمروم بویو بئله گلیب منیمکی:
اولیندن بیری واردی، بیری یوخ.
اوزاقدایدی من ایسته‌ین اوجاقلار،
اورییمدن گلیب کئچدی سازاقلار.
آتالییدی، آنالییدی اوشاقلار
بیزیم ائوده بیری واردی، بیری یوخ.

گؤزلریمه دولدورموشام یاغیشی،
بیر کؤینکله چیخارمیشام من قیشی.
شالوار، پئنجک گئیینیردی تای-توشوم
من‌ده ایسه بیری واردی، بیری یوخ.

اوزوم گولدو طلبه‌یم دئینده،
سیخیلیردیم دوست پنجیی گئینده،
معلمله دیل تاپا بیلمینده
قیمتیمین بیری واردی، بیری یوخ.

قلبیم یاندی، ایلک سئوگیمدن، عشقیمدن،
دارا دوشدوم، ال اوممادیم هئچ کیمدن.
مجلیسلرده جان دئییب،جان ائشیدن
دوستلاریمین بیری واردی، بیری یوخ.

من اوردویا نلر گؤروب گئتمیشدیم،
اورک آلیب، اورک قیریب گئتمیشدیم.
ایکی قیزا کؤنول وئریب گئتمیشدیم،
قاییداندا بیری واردی، بیری یوخ.

اوزاق گزدی عمی، دایی، بیبیلر
سؤزآراسی منه "ائولن" دئدیلر.
نیشان اوچون ایکی شی ایسته‌دیلر،
منده ایسه بیری واردی، بیری یوخ.

واخت گله‌جک بو گونو گؤرجکسن،
چوخ سوالا گؤزونو دؤیجکسن،
واخت گله‌جک سن اؤزون دئیجکسن،
دئیه‌جکسن: "بیری واردی، بیری یوخ".

زاکیر علیئوین ایفاسیندا "بیری واردی، بیری یوخ"او بورادان دینله‌یه بیلرسینیز: