باکی دؤولت اونیوئرسیتتینده طلبه اولدوغوم واختلار فاکولته‌میزده شعر درنیی تشکیل ائلمیشدیم، هر هفته تانینمیش بیر شاعرله گؤروش کئچیریر، تدبیری ده اؤزوم آپاریردیم. هردن آتامین شعیرلرینی اؤز شعیریم کیمی ده دئییردیم. بیرینجی کورسلارین باشینی آلداتماغا نه وار کی؟ هر ایل اونیورسیتته یئنی طلبه‌لر داخیل اولاندا بیزی ماراق بورویوردو کی، گؤره‌سن، گؤزل قیزلار چوخمو اولاجاق، آزمی اولاجاق؟ اونلار شعیره، ادبیاتا ماراق گؤستره‌جکلرمی، درنییمیزه گله‌جکلرمی؟

یاخشی خاطیرلاییرام، یئنی تدریس ایلینین ایکینجی آییندا درنییمیزه شلاله (آد و سویاد شرطی‌دیر) آدلی بیر قیز گلمیشدی. او دا شعیر یازیردی. ساکیتجه گلیردی، زالین آرخا طرفینده اوتوروردو. دیندیرمه‌سن، دینمیردی. دانیشدیرماسان، دانیشمیردی. ائله بیل شلاله‌نین آغزی یوخ ایدی، ائله بیل دیلینی-دوداغینی پیشیک یئمیشدی. منه ده چوخ غریبه گلیردی کی، بو قیز نیه بیر سؤز دئمیر، نیه دانیشمیر؟ اوتانجاقلیغیندان بیلیردین کی، کند قیزیدیر. اوجقار بیر داغ کندیندن گلمیشدی.

شلاله بیر نئچه آی درنییمیزه گلیب-گئتدی و نهایت کی، گونلرین بیر گونو دیلی آچیلدی. آچیلان کیمی ده شعیرلرینی منه وئریب غریبه بیر خواهیش ائلدی:

– کرامت بی، من شعیر یازیرام، اما نه قدر ائدیره‌م قافییه‌لری دوز گلمیر. اولارمی سیز شعیرلریمین قافییه‌لرینی دوزلدسینیز؟

– البته، اولار.

– خواهیش ائدیره‌م، قافییه‌لرینی ائله دوزلدین کی، اوخویاندا آداملارین اوریینین ساری سیمینه توخونسون، – شلاله دئدی.

اولجه ائله بیلدیم منی اله سالیر، سونرا گؤردوم کی، یوخ، ائله آغلی بئله کسیر. هر حالدا من ده اوشاق دئییلدیم، ان آزی اوچ ایل درنک رهبری کیمی تجروبم واردی. هله دیگر ساحه‌لرده تجروبه‌می دئمیرم. فیریلداق بیر ایش اولسایدی، او ساعت حس ائدردیم.

شلاله شعیرلرینی ال یازمادا منه وئردی. اونون گؤزلرینین ایچینه باخیب دوشوندوم کی، دوغرودانمی بو گؤزللیک شعیر یازیر؟ اینانین، دونیانین هئچ بیر شعیری شلاله‌نین ایشیقلی اوزو، وولکان گؤزلری، آشمیش قاییغا اوخشایان قاشلاری، قورخاق باخیشلاری قدر گؤزل اولا بیلمزدی. اما ایشینه-گوجونه باخین: من‌دن خواهیش ائدیر کی، اونا قافییه تاپیم.

کیم اوزونه باخسا، بیلردی کی، یوز فایز بیرینجی کورسدا اوخویور. چونکی هله تجروبه‌سیز ایدی، هله حیله گرلشمه میشدی، دانیشاندا دیلی-دوداغی اسیردی. اوزو او قدر تمیز ایدی، ائله بیل یاناقلاریندا آی دوغموشدو، گؤزلری ایشیق کیمی یانیب سؤنوردو. من ایسه بو منظره قارشیسیندا اؤزومو تمامیله سویوققانلی آپاریر، ائله حرکت ائلییرم کی، گویا اونون گؤزللییندن خبریم یوخدور. اصلینده، اؤزومه اعتبار قازانیردیم.

اما نئجه اولدوسا، شلاله قفیل یوخا چیخدی، داها درنییمیزه گلمه‌دی. شعیرلری ده منده قالدی، هئچ گلیب گؤتورمدی. اؤزومله او قدر گزدیردیم کی، آخیردا هارداسا ایتیردیم. او واخت من‌ده غریبه بیر اگویستلیک (غرور) ده واردی، فیکیرلشدیم کی، نییمه لازیمدیر، او کیم‌دیر کی، آرخاسینجا دوشوم، یالواریم؟

آرادان ایللر کئچدی، اونیورسیتته یئنی طلبه‌لر گلدی، درنییمیز داها دا مشهورلاشدی، پارلادی. و گونلرین بیر گونو شلاله‌نی اونیورسیتتین قارانلیق بیر پیللکه‌نینین آلتیندا گؤردوم، بیر آیاغینی قالدیریب دیوارا سؤیکه‌ییب سیگارئت چکیردی. یانیندا ایکی-اوچ اوغلان دا واردی. اؤزلری اوچون دئییب-گولوردولر. قولوندا دؤیمه-زاد بسلییردی. کئفی یاخشی ایدی، اما او ایشیقلی اوزده‌ن، او وولکان گؤزلردن، او آشمیش قاییغا اوخشایان قاشلاردان، او قورخاق باخیشلاردان اثر-علامت قالمامیشدی. یانینداکی اوغلانلارلا شیت-شیت زارافاتلار ائد‌نده گؤردوم کی، آبیر-حیاسی دا یاناغیندا دوغولموش آی کیمی یوخا چیخیب. ان اساسی ایسه شلاله سیگارئتی ائله چکیردی، ائله چکیردی، توستوسو آدامین اوریینین ساری سیمینه توخونوردو...