کولت. آذ گونئی‌لی یازار و آراشدیرماجی ایواز طاهانین یازی‌سینی تقدیم ائدیر:

بیلمیرم، بو چیرکین »تأسف ائدیجی« سؤزو هاردان دیللره دوشوب؟ بعضا گومان ائدیلیر کی، »تأسف ائدیجی« سؤزونو ایشلتمدن آنلامی یئترینجه چاتدیرماق اولماز؛ بعضا ده سیاسی بیر اولایین تراژیک ماهیتینی گؤسترمکده «تأسف ائدیجی»دن یان کئچیلمیر.

سوسیال شبکه‌لرده بئله بیر جمله ایله قارشیلاشدیم:

تأسف ائدیجی‌دیر کی، حبس اولونان اشخاصلار (اینسانلار) حبس ده اولا-اولا... (البته جمله‌نین باشقا بؤلوملری ده سهودیر.)

«تأسف ائدیجی» سؤزو فارسجادان گلمه یانلیش ترجمه‌نین اورونودور. «تأسف ائدیجی»نین فارسجا آنلامی «متاسف کننده» و یا «متاسفانه« دئییل: تأسف ائدیجی: تاسف کنده؛ تاسوف ائدیجی‌دیر: تاسف کننده است. بئله بیر قورولوشون عیبجر اولماسی گون کیمی آیدیندیر.

جمله‌نین آنلامین‌دان آسی‌لی اولاراق بو پروبلئ‌می بیر نئچه قارشی‌لیقلا [مادلله] آرادان قال‌دیرماق اولار:

تأسفله

تاسسوفدوغوران

تاسسوفلندیریجی

نه یازیق

اؤرنک:

تاسسوفله، حبس اولونان/ دوستاق اولونان شخصلر محبسدیکن...

حکومتین دیل مسئله‌سینه یاناشما طرزی تأسف دوغورور.

سیزین بو سؤزونوز تاسسوفلندیریجی‌دیر.

نه یازیق/نه یازیق کی، دوستاق اولونان شخصلر محبسدیکن...

باجاردیقجا سون واریانتی ایشلتملیگیک.

«تأسف ائدیجی« سؤزو اولدوقجا تأسف دوغورور، یئری گلدیکده اونو اونودوب، «نه یازیق کی» و «نه یازیق» کیمی قارشی‌لیقلاری قوللانماق یئرینه دوشردی.

گؤروندویو کیمی »تأسف« سؤزونو تام فونئتیک یازمیشام: تأسسوف.