چاغداش آذربایجان ادبیاتینین گؤرکم‌لی سیمالاریندان شاعر واقیف بایاتلی اودر (واقیف جبراییلوو) ۱۹۴۸-جی ایل اوکتیابرین ۱-ده جبراییل رایونونون بؤیوک مرجان‌لی کندینده آنادان اولوب.

آذربایجان اینشاعات مهندیسلری اینستیتوتونون صنایع و مولکی تیکینتی فاکولته‌سینده تحصیل آلان جبراییلوو باکی‌دا ۴۴۵ سایلی تیکینتی ایداره‌سین‌ده فحله، اینشاعات تکنیکی، ۴۸ سایلی تیکینتی ایداره‌سینده نورمالاییجی مهندیس، «محصول" جمعیتی مرکزی شوراسیندا مهندیس ایشله‌ییب. او، همچینین «اولدوز» ژورنالیندا شعبه مودیری (۱۹۸۱-۱۹۹۰)، «خزر» توپلوسونون باش رداکتورو (۱۹۸۹-۱۹۹۲)، آذربایجان تلویزییا و رادیو شیرکتینین خاریجی اؤلکه‌لره وئریلیشلر ایستودییاسینین دیرکتورو(۱۹۹۲) وظیفه‌لرینده چالیشیب.

۱۹۸۱-جی ایلدن آذربایجان یازیچیلار بیرلیینین عضوودور.

۱۹۹۱-جی ایلده آذربایجان یازیچیلار بیرلیینده گنجلرله ایش اوزره کاتیب سئچیلیب. عوموم ایتیفاق کنفرانسلارین‌دا، سوویت ادبیاتی گونلرینده، ۱۱-جی پویزییا (شعر) فستیوالین‌دا ایشتیراک ائدیب.

آذربایجان مطبوعات فوندونون "میرزه جلیل موکافاتی"نا (۱۹۹۳) و موسکوانین "مولودایا قواردییا" نشریاتینین کوتلوی تیراژلا بوراخدیغی "سیچراییش" کیتابینا گؤره گورجوستان نازیرلر سووئتینین "ولادیمیر مایاکووسکی موکافاتی"نا لاییق گؤرولوب.

«تنها اولدوز آلتین‌دا»، «اونودولاجاق بوتون سئودالار»، «اؤلنه‌جن سئومک آزدیر»، «ان گولمه‌لی اؤلو»، «یوپیومرو بیر عشق ایله» کیتابلارینین مؤلفیدیر.

واقیف بایاتلی آذربایجان پویزییاسین‌دا (شعرینده) یئنی و تمام فرقلی بیر مرحله‌نین اساسینی قویوب. او، شعیرلرینده طبیعتله، حیاتلا، سما ایله بوتونلشمیی، یاشامین شیفره‌لرینی سؤزه کؤچورمیی بؤیوک اوستالیقلا باجاریر. واقیف بایات‌لی سؤز ایله دایم گؤیه جان آتیر. بو باخیمدان معاصرلری اونو گؤی آدامی، سما شاعری آدلاندیریرلار.

Kult.az واقیف بایاتلینین ان چوخ سئویلن شعیرلرینی تقدیم ائدیر:

من ظالم آدامام، کامانچا

قارداشیم آغاجلار، باجیم چیچکلر،

بیر ده سؤز توتدو سیزی،

سؤز توتدو، سئودا قوروتدو،

اوز توتوب یویورمیین منه ساری،

باغلانیب گؤزومون

یاش قاپاقلاری.

دونیانین بلا قاپیلاری

قالا قاپیلاری، داش قاپیلاری،

یئتیم قاپیلاری، بوش قاپیلاری

باغلانیب کؤنلومه، باغلانیب

باغلانیب گؤزومون یاش قاپاقلاری

من سؤز بلاسییام،

ظالم تیفیلی.

سوروشوب آلنیم‌دان تانرینین الی

داها سن ده

سن ده آغلاداممازسان منی

من ظالم آدامام، کامانچا.

بیر ده کیم‌سه‌نی سئومه‌یه‌جه‌یه‌م

بیر ده کیم‌سه‌نی سئومه‌یه‌جه‌یه‌م

بو گئجه ندن‌دیر هامی‌دان قاباق

آغرییان، قلبیمه یانیرام دوستلار،

بیر ده سئودا ندی، بیلمه‌یه‌جه‌یه‌م،

بیر ده بیر کیم‌سه‌نی سئومه‌یه‌جه‌یه‌م.

بیر ده بو دونیادا عشق‌دن یازماغا،

گئجه‌لر آزماغا داها حالیم یوخ.

بو خان اوغلانلارا، خانیم قیزلارا

قارا سئودا ندی، بیر سوالیم یوخ.

گئتدی گؤزلریمدن بیر دوه کینی،

گئتدی قوللاریمدان کوچه داواسی.

باهار آغاجلاردان چکیلن کیمی.

چکیلدی باشیمدان گنجلیک هاواسی.

کؤنلوم دلی‌لیگی اونوتدو چوخدان،

آخیر کی، آغلیمین سسینه اویدوم.

قونور گؤزلریمده یورغونلوق – حاقدان،

دویدوم کوچه‌لردن، یوللاردان دویدوم.

بیر ده سئودا ندی، بیلمه‌یه‌جه‌یه‌م،

بیر ده کیمسه‌نی سئومه‌یه‌جه‌یه‌م.