آخار. آز پرویز سیدلینین "بیر قادینین قوللارین‌دا اوشومک‌دی ان چتینی..." شعیرینی تقدیم ائدیر:

چوخ سویوقلار گؤرموشوک

اوشوموشوک قارلی، سویوق هاوالاردا

اما او واخت بیلممیشیک

بیر قادینین قوللارین‌دا اوشومک‌دی ان چتینی

ان چتینی بیر قادینین قوللارین‌دا اوشومکدی

نه گیزلدک، قورخموشوق دا،

قورخوموزدان سوسموشوق دا، آغاریب‌دی رنگیمیز ده

دن دوشوبدو، چاللاشیبدی ساچیمیز دا

اما او واخت بیلممیشیک

بیر قادینین ساچلارین‌دا

دنه دؤنوب آغارماق‌دی ان چتینی

ان چتینی بیر قادینین ساچلارین‌دا دنه دؤنوب آغارماقدی.

گئجه‌لری اؤپوشلره قرق ائد‌رک یاتیزدیریب

سحرلری سیغاللارلا اویاتمیشیق

اوزاتمیشیق اؤزوموزچون او خوشبخت‌لیک آنلارینی

اما او واخت بیلممیشیک

بیر قادینین مورگوله‌یه‌ن کدرینی اویاتماق‌دی ان چتینی

ان چتینی بیر قادینین مورگوله‌یه‌ن کدرینی اویاتماق‌دی

بوغازین‌دان بئلینه‌جه‌ن رقص ائلییب دوداغیمیز،

توخونموشوق، یولوخموشوق تر قوخولو بدن آدلی بیر مرزه

اما او واخت بیلممیشیک

بیر قادینین گؤزلریندن روحوناجان توخونماقدی ان چتینی

ان چتینی بیر قادینین گؤزلریندن روحوناجان توخونماقدی.

سرت اولماغا چالیشمیشیق

آلیشمیشیق آغیر-آغیر یانیندایام سؤیله‌مه‌یه

اما او واخت بیلممیشیک

بیر قادینین دیزلرینده اوشاق کیمی آغلاماقدی ان چتینی

ان چتینی بیر قادینین دیزلرینده آغلاماقدی اوشاق کیمی...

اما او واخت بیلممیشیک...

هئچ ایندی ده بیلمیریک کی...