کولت. آذ آذربایجانین گنج و ایستعدادلی شاعری آقشین ائوره‌نین "قادین اوزاقلیغی" شعرینی آکتیور کامران یونیسین ایفاسین‌دا تقدیم ائدیر:

گئدیشین‌دن بیر گون اؤتدو
ایندی ساعت اون آلتیدیر.
بئله گؤز یاشین‌دان سونرا
داها عؤمور سوآلتی‌دیر.

منه بیر پیس‌لیک ائله
سنی آسان اونوتماقچون.
بیرجه الجیینی ساخلا
گؤز یاشی‌می قوروتماقچون.

قوجاغیم بوش‌دور...قیریرام
کؤینییمین هر دویمه‌سین
چوبانیاستیغی فالی تک:
"گلسین، یوخسا گلمه‌سین؟"

ان تمیز سیغالیمی دا
آپارمیسان اؤز اوزونده.
آستارا چئوریلیب ائویم
قالمیشام چؤلون دوزونده.

گل بو آخشام گئری قاییت
قوجاغیندان اوتاق دوزلت.
اوزاقلاردادیر خوشبختلیک
ساچلاریندان اوزاق دوزلت.

سئوینجیمی سنه وئریم
قوی اوزون گولسون همیشه.
من یاشاماغا یوخ...سنی
خوشبخت ائتمه‌یه گلمیشم.

گل حیات یئنه باشلاسین
دونیا دا سنه اوخشاسین
...و سن اولسون دؤرد بیر یانیم
هر گون، هر آخشام سسله‌نیم:
"آی بالاجا خانیمیم..."