کولت. آذ صدیار ائل اوغلونون " آپار منی " شعیرینی تقدیم ائدیر:

آپار منی

آی اللری قوینوندا طالعینه یالواران
منیم یوز ایللیک دوستوم!
نه آغیر کئچیر ایللر؛
هله ده کی دئییرلر:
کلید دوه بوینوندا.!
قالخ الینی وئر منه، قوپار منی بو یئردن!
او قدر اوتوردوق کی،
بو تورپاغین، بو ائلین گونشی ده، آیی دا-
گئرییه دؤنمز اولدو گئدیب، یاتدیغی یئردن.
باخار کورا دؤنموشوک یوللاری گؤزله‌مکدن
بیز آیلاری، ایللری، کیملری گؤزله‌مکدن.
هانی قارانقوشلاری بو شهرین، بو ائلین؟
داها قاییتماز اولدو دورنالاری گؤللرین.
وئر الینی الیمه، آپار منی بو یئردن!
آپار قاراداغدا کی،
پؤهره شیللان کولونا ایلیشدیر اوره‌گیمی.
بیر بؤیورتکان کولوندان آسلا دوداقلاریمی.
آپار منی بو چؤلدن!
ایلیکترون ایشیقلار کورا- قیپیق ائدیبدیر
ایدراکیمی‌، حیسیمی.
زهر بارداغی اولدوق
بو شهرده حیاتین آجیسینی دادماقدان.
گؤزوم ساری نرگیزین گؤزلرینده قالیبدیر.
آپار منی بو ائلدن،
آسلا باخیشلاریمی‌بیر قارتال یوواسیندان.
باخیم اوزاقلارینا من اوبامین، ائلیمین.