کولت. آذ زامیق زردابینین "بو باغ بیزیم باغیمیزدیر" شعیرینی تقدیم ائدیر:

بو باغ بیزیم باغیمیزدیر،

بو باغ بیزیم

گنجلییمیز،

ایلک عشقیمیز،

بو باغ بیزیم

ان بختور،

ان فیراوان چاغیمیزدیر…

بیز بو باغین

هر گولونو قوخلامیشیق،

بیز بو باغدا هر چیچه‌یه،

آغاجلاردان

بیزه باخیب، گولومسه‌یه‌ن

هر یارپاغا توخونموشوق،

ظریفلیین،اینجه لیین

یوخلامیشیق.

بیز بو باغی

یورولمادان،

اوسانمادان بیر گزمیشیک،

ازیلمکدن جانا دویموش

اوتلارینی بیر ازمیشیک...

بو باغ بیزیم باغیمیزدیر،

بو باغ بیزیم، سئوگیمیزین

سینه‌میزده یاراتدیغی،

چالین-چارپاز داغیمیزدیر...

بو گون حیدر علیئوین،

صاباح «علی علیئو»این،

سونرا «ولی ولیئو»این،

نه فرقی وار

کیمین آدین داشییاجاق،

اساس اودور

بو باغ بیزیم قلبیمیزده،

ایلک گنجلیین

بیزه میراث بوراخدیغی،

خاطره تک یاشایاجاق...

بیز بو باغی

یادیمیزدان سیلممریک،

لاپ یوز ایل ده اؤتوب کئچسه،

ان سئویملی آداملارین

آراسیندا اولساق بئله،

بیز بو باغدا،

ایللر اول ایکی گنجین

گولدویو تک گولممریک

گولوشوموز دونوب قالار

اوزوموزده،

آغزیمیزدان چیخان آندا

یاددان چیخار

سؤزوموز ده

هئچ کیم باشا دوشه بیلمز

نیه گؤره،

کدر گلر،

یاش گؤرونر گؤزوموزده...

بو باغ بیزیم باغیملزدلر،

اما داها

بیز قورخاریق

آداملارین،

بیزه باخیب ایستهزایلا

باش یئلله‌دن آغاجلارین،

تنه‌سیندن،

بیز قورخاریق

اوغلوموزون، قیزیمیزین

بیزی قوشا گؤرمه‌سیندن...

بیز بو باغا،

بیر ده قوشا گلممریک...

گلممریک...