کولت. آذ حسین رمزینین "دالیمجا گلمه‌سین کؤلگه‌م" شعیرینی تقدیم ائدیر:

بو گئجه گئدیرم دای گوله – گوله
گئدیرم؛ گؤز یاشین هئی سیله – سیله
بیلن یوخ؛ اؤلورم من بیله – بیله
تاپشیرین دالیمجا گلمه‌سین کؤلگم!

من یاریمین یارا یئری اولدوم آه…
توز کیمی‌اؤز گؤزلریمه دولدوم آه…
دوز یولومو گئده – گئده یولدوم آه…
تاپشیرین دالیمجا گلمه‌سین کؤلگم!

اؤزومو سیرتیمدان ووروب دا دوشدوم
گؤى تانریم گؤزوندن داملا تک دوشدوم
من، نه گئرچک‌ایدیم، نه ده بیر دوش دوم
تاپشیرین دالیمجا دوشمه‌سین کؤلگم!

او خزر گؤزلومون گؤزو قارالمیش
بوکولموش کؤلگه‌مین اوستون قار آلمیش
بو قار آدامی‌نین قانی قارالمیش
تاپشیرین دالیمجا گلمه‌سین کؤلگم!

سیزه بیر سؤز دئیه‌جه‌یدیم اولمادی
ساندیم درده ده‌یه‌جه‌یدیم، اولمادی
آما، بیرین سئوه‌جه‌یدیم اولمادی
تاپشیرین دالیمجا گلمه‌سین کؤلگم!

بو گئجه گئدیرم دای گوله – گوله
گئدیرم؛ گؤز یاشین هئی سیله – سیله
بیلن یوخ؛ اؤلورم من بیله – بیله
تاپشیرین دالیمجا گلمه‌سین کؤلگم!