قاضینی سایمادان اسکلئتی گؤیلوم ایسته‌ین کیمی دیک یئریندن گؤتوروب آستا- آستا آزمایشگاهین قاپیسینا ساری یوللاندیم. او ایسه بیر گؤزو قالیب آلکوْل چیراغینین شعله‌سی اوستونه توتموش بالون ژوژه‌ده، بیر گؤزویله ده منی گودور. بیلیرم، ایچی- ایچینی یئییر. بیلیرم، ألی بند اولدوغونا گؤره، حیرصلی آددیملاریلا گلیب ألیمی اسکلئتین قاسیغیندان چکیب، بودلارینی قوللاریم اوسته سالیب قوجاغیما وئره بیلمه‌یه‌جک. بیلیرم، ألی بند اولاندا گوجو آنجاق یالاخ دیلینه چاتار. سؤزونو یئرینه یئریتمه‌یینجه عئینی جومله‌نی بیر- ایکی دفه دالبادال تکرار ائلر.

«اویدان یوخ، اسکلئت اولاندا نولای؟ اسکلئتین ده حؤیمتینی ساخلامالیسان! ألیوی اویدان چح، آپای بود سومویونون آلتینا، آل قوجاوا آپای...»

اونون ألی بند اولدوغونا گؤره منیم ده کئفیم بیستینی ویریر. سئودیییم کیمی اسکلئتی داشیییرام. هله خبری اولسا کی اسکلئتین آدینی برژیت قویموشام، یقین ألینده‌کی بالون‌ ژوژه‌نی قاینار محلول ایله بیرلیکده باشیما چیرپار.

«بلکه ائسکلئت قاضینین ده ماتروشکاسیدی!»

عنبرین سؤزونه گولمه‌ییم گلیر. قاضینین پاتلئتینه یاراشمیر ماتروشکا آدینین حتی «م» حرفینی ذهنینین اوجوندان کئچیرسین، هاندا قالسین کی خیال گوجویله اسکلئتی ماتروشکاسی یئرینه توتسون.

...

قاضی دوردوغو یئرده، گؤزونو بالون ژوژه‌دن چکیب، دؤرد گؤزلو منی گودور. أصلینده منی ده یوخ، أللریمی گودور. دؤرد گؤز اولماسین، لاپ بئله اون‌دؤرد گؤز اولسون. نه قدر گودور گودسون. ذهنیم آینا دئییل کی برژیته اولان حیس‌لریمی اوز- گؤزومده گؤره بیلسین!

عنبر دئییر: «بوش- بوشونا خیال قورما، اسکلئت کیشیدی!»

آمما اسکلئتین أللریله آیاقلارینین اینجه سوموکلری، اوسته‌لیک، اومبا سومویونون دیک اولدوغوندان ظنّ ائدیرم اسکلئت قادین اولمالیدیر. اؤزو ده صیفتینین سوموک قورولوشوندان برژیت کیمی بیر قادین اولدوغو معلوم اولور. اوزونه بیر ایکی لای أت- دری چکیلسه، لاپ بئله برژیتین ائکیزتاییسی اولار...