axar.az آرش احمدینین "نئجه‌سه‌ن" شعیرینی تقدیم ائدیر:

باری بیر شعیر یاز بیلیم نئجه سن،

نئجه بير شعيرسن

کلمه لرله گیزلی گیزلی یاز

اورانین توتقون هاواسینی

مکتوبونو اوخویاجاق پولیسلر بیلیرم!

اللرینین ایزی قالماسین...

یوللادیغین سون مکتوب دا

شاقیلداییرلار کلمه لر سطیر سطیر

آغاجدان یارپاق لار تؤكولور سندن يارالار

گؤز یاشلارین دنیز اولوب دوشور اوستومه

حالین یاخشی دیر یازمیشدین

آمما يازديقلارينين حالى ياخشى دئييل

یازدیغین مکتوب دا

قوشلار داریخیب اوچوشا و پاییز فصلی...

اوشودوم دوغروسو اوخودوغومدا

ساعات لار دایانیب سانکی اوردا

بئتون آغیرلیغی هر سطرین

هر سطيرينده بير كروان كؤچور بو فانى دونيادان

و هر قارشیلادیغیم سون نوقطه ده اؤلومو سلاملادیم...

اوتاغین قارانلیق

اوتاغین یالنیزلیق

اوتاغین سوکوت دو

شئطان لار رقص ائدیر

قیرجانا قیرجانا نمازی سانکی هر اشهدینده توللانیرام انتحارا...

دوروموندان یازمیشدین

او آن زیندانی خاطیرلادیم

الی قولو باغلی

و موفتیشین اوستومه ایشه دیینی...

سانکی زیندان لار

سانکی سورولار

سنی الی قولو باغلاییب

ایشه ییرلر اوستونه...

باشیم گیجه لیر قاداسی

قافاما قورشون اولوب تاخیلیر مکتوبون...

باری بیر شعیر یوللا بیلیم نئجه سن

بارى بير شعيرده نئجه اولدوغونو

پنجره ائت

او پنجره نى آچسين آرش

و باخسين سنى احاطه ائدن آلانلارا...

حالين نئجه دير

حالين تبريزيم جولفام اولسايدى كئشگه...