Kult.az گونئی آذربایجان‌لی شاعر، میللی-مدنی فعال حبیب ساسانیانین «یاندیریلان کیتابلار» شعرینی تقدیم ائدیر:

عربی - موْنقولو، قینایان فارسلار

موْنقولون اۆزۆنۆ، آغ ائیله دیلر

اوْلمایان علمینی، ماسوْن اَلیله

شیشیردیب بیر یئکَه، داغ ائیله دیلر!

تیسفون دانشگاهین، جندی شاپورو

خیالدا قوردولار، یاندیرتدیردیلار

مظلوم گؤستردیلر، دونیایادا فارسی

یالاندان بیر یئنی تاریخ قوردولار!

هر کیمسه سوْروشدو، "بو اوْلان دگیل"

خایین آدلاندیریب، ساتقین دئدیلر

«ایران وای» دییه رَک، گئجه -گۆندۆزۆ

آزربایجان حاققین، آیدین یئدیلر!

توَحّش ایشلَری، موْدئرن عصریده

قیناییب اؤزلَری، وحشی اوْلدولار

گؤزلَری گؤتۆره بیلمه دی بیزی

اؤزلَری تبریزده، قاتل اوْلدولار.

اوْتوزمین، آزاده فداییلَری

اؤزگۆرلۆک جۆرمۆنه، بۆتۆن قیردیلار

ایکی گۆن اؤتمه میش بو جنایت دن

ییغیب تۆرک کیتابین، توْنقال قوردولار!

دۆنیا گؤزلَرینی، یومدو بو ایشه!

آذردَه، تورکلره، جَلَه قوردولار

تۆرکجه کیتابلارا، اوْردو گۆجۆنه

آزادلیق آدیندان، بیر اوْد ووردولار!

اوْلسایدی بو خالْقین باش بیلَن لَری

سوْی قیریم اوْلماغین، دۆنیا بیلردی

میللت لَر شوراسی ،یالاندی -یالان

لاهه دیوانیندا، حاققین دیلَردی.

گؤرۆنۆر اؤزگَه دَن، عدالت اومماق

یانلیش دۆشۆنجه دی، یالان اینامدی

گۆوَنمک گرَکدی اؤز کیملیگینه

یاکاموز بیلیرسن، وطن دۆنیامدی.

(یاکاموز)