Kult.az میرجمال حسینینین "من اؤلسم، سن آزاد یاشا" شعیرینی تقدیم ائدیر:

بیر داشین آلتیندا سون سیگارئتین
مینلرجه اومودلا آلیشدیریردی.
آزادلیق دویغوسون، وطن سئوگیسین
اورکده اومودلا باریشدیریردی.

بؤلوردو تورپاغی تمیز ویجدانی
رعیتین کندلی‌نین درد اوداسیندا.
گزیردی دویغوسو مظلوم ائلینین
ظولمده جان وئره‌ن هر اوباسیندا.

سیلیردی گؤزیاشین، هؤروردو ساچین
آتاسی آسیلمیش او یئتیم قیزین.
بیر آنلیق دیکسینیر کولک سسینه،
بوغوندان قوپاریر آسیلمیش بوزون.

چکیب آپاریردی اوره‌یین، هوشون
شاختادا، کولک‌ده آزادلیق سسی.
یئنه خیاللارین ایسیندیریردی
استقلال بایراغی، تبریز هوسی.

بیر داشا سؤیکه‌نیب یورغون دئموکرات
هردن مورگوله‌ییر، هردن آییلیر.
هاچاندیر ووروشور داغ دره‌لرده
ائلینین دردینه مرهم قاییریر.

دیکسیندی فدایی گولله سسیندن
بویادی آل قانی داغلارین قارین.
قارشیدا ایکی بئی، ایکی امنیه
کسدیلر یولونو پاک آرزیلارین.

آستاجا سؤیله‌دی سون نفسینده
من اؤلسم ای یوردوم سن آزاد یاشا!
هله سیگارئتی توستوله‌نیردی
سؤیکندی بوز وورموش او سویوق داشا.