Kult.Az آذربایجانین گؤرکه‌م‌لی شاعری بختیار واهابزادنین "یامان داریخمیشام" آدلی شرینی گونئی‌لی شاعر فرروخ جرایددینین اسکی الیفبایا چئویرمه‌سین‌ده تقدیم ائدیر:

یامان داریْخمیشام سنین چۆن ، یامان !
من اسیر دۆشمۆشم اؤز ایسته‌گیمه.
نفرت-ی گیزلتمک آسان دیر آسان
سئوگی‌نی گیزلتمک محالمیش دئمه!

هارایلار یۆکسه‌لیر کؤنۆلدن یئنه
بوُ نئجه هارایدی بوُ نئجه های دیْ؟
عهده‌مدن گلردیم ....
گؤزۆم گؤزۆنه
قوُلاغیْم سسینه داریْخماسایدی ... .

ائله بیل هر یئردن اۆزۆلۆب الیم
من آزیْب قالمیْشام غـم دره‌سینده
دیریلیب یاشانیْر سن‌لی گۆنلریم
سن‌سیز گۆنلریمین خاطره‌سینده .

یامان داریْخمیشام ....
بوُ نه‌دیر یئنه ،
عاغلیْم ساغا باخیْر اۆرگیم سوْلا
اۆرگیم دؤنۆبدۆر گؤی گؤیَرچینه
قوْنوب سن گئده‌لی ، سن گَلن یوْلا .

یامان داریْخمیشام.....
هر آخشام چاغیْ
آرزومو گۆنشین تئلینه ساردیْم
منیمله اوْلسایدین ، من داریْخماغی
زامانا اَن اوُزون اؤلچۆ ساناردیْم .

یوُخوما گلمیشدین ...
قیْسیلدیق کۆنج-ه ( کُنج، گوشه)
دانیْشدیق.....
یئل اَس‌دی...
داغیْلدی درد-غـم
کؤلگه‌یه دؤنۆشدۆم ،
سنی گؤرۆنجه
سنین ایْشیغیندا یوْخ اوْلدو کؤلگه‌م.

بختیار واهابزاده