Kult.az ممد آرازین آشیق حسین جوانلا ایستی سو یایلاقلاریندا گؤروشوندن تاثیرلنرک یازدیغی شعیری تقدیم ائدیر:

آشیق جوان ساریلمیشدی سازینا،
توی قورموشدو دونه‌نینین یاسینا.
او، دردینی یا سیندیرا، یا سینا؛
غضبی کؤکلنیب داغین-داشین دا،
تبریز آغلاییردی داغلار باشین‌دا.

حیرتین‌دن دونموش ایدی دلی داغ،
نفس چکیب ایشقیریردی اود-اوجاق.
گؤیمو یئری، یئرمی گؤیو اوداجاق،
بولودلار اوفوق‌ده علی قاشین‌دا...
تبریز آغلاییردی داغلار باشین‌دا.

دلی میضراب «بختی کمی» اویادیر،
غم حیرتی، حیرت غمی اویادیر،
اؤزو یاتیب، بو عالمی اویادیر --
بیر ساییل بختی یوخ مین بیر یاشین‌دا،
تبریز آغلاییردی داغلار باشین‌دا.

فریادین‌دان قویون-قوزو دوروخ‌دو،
آغلایان سو، چاغلایان سو دوروخ‌دو.
قارا یئلین سئل اوموسو دوروخ‌دو،
دره‌لر سنگیدی یاز یاغیشین‌دا،
تبریز آغلاییردی داغلار باشین‌دا.
تبریز آغلاییردی - دئدیم...
نه دئدیم؟!
آغلایان بیر سازین تئلینه دئدیم،
ساری یاماجلارین سئلینه دئدیم.
آغلاماز سؤز یوردو داغلار باشین‌دا،
تبریز اوخویوردو داغلار باشین‌دا!

قاری ننه، نئهره‌ن دوندو چاتمادا،
گیزلی آهین فلکلره چاتمادا.
هجر آنا، هجر آنا، چات دادا.
تبریز آغلاییردی داغلار باشین‌دا -
تبریز اوخویوردو داغلار باشین‌دا!

آغلاسا، آغلاردی ایلدیریم کیمی،
گورشاد ساچی یولان سیلدیریم کیمی،
قاپیب شیمشکلری بیر شیریم کیمی
نغمه توخویوردو داغلار باشین‌دا،
تبریز اوخویوردو داغلار باشین‌دا!

آغلاسا - آیاقدا توفنگه دؤنر،
بالاسی وورولموش پلنگه دؤنر.
بیر دره آغیزلی نهنگه دؤنر،
دومانلار یاس قوردو داغلار باشین‌دا،
تبریز اوخویوردو داغلار باشین‌دا!

گرک دیل سوساندا اللر دانیشا،
اللر باغلاناندا دیللر دانیشا
ائله دانیشالار، ائللر دانیشا...
دلی گولوشلریم آغلار باشیم‌دا،
تبریز اوخویوردو داغلار باشین‌دا.