کولت. آذ بختیار واهابزادنین ایران‌دا اسارت حیاتی یاشایان آذربایجان تورکلرینین دیلی، آزادلیغی اوغرون‌دا مباریزه آپارمیش گونئی‌لی مرضییه اوسکویییه حصر ائتدیی "مرضییه" پویماسین‌دان بیر پارچا اولان "آنا دیلیم" شعیرینی تقدیم ائدیر:

من چال دئدیم اوجال دئدیم
من وور دئدیم قالدیر دئدیم
سؤز هوجومدور سؤز حمله‌دیر
بیرجه کلمه بیر جمله‌دیر
سن دیلده‌کی قودرته باخ جراته باخ
بیر جمله‌نی بیر کلمه‌یه سیغیش‌دیران
کلمه‌ده‌کی باریتا باخ
یوز ایللرین الییندن آریدیلمیش
آریتا باخ
دده‌لریم بو سؤزلرین
آلووونو گئیینیب‌دیر
اورکلری بو سؤزلرین
وورغوسو ایله دؤیونوبدور
قالخان تاخیب قالخ سسینه
ووروشوبدور وور سسینه
آخی نیه دییشدیرک
بیزیم قورقود آتامیزین
یاراتدیغی کلمه‌لری
باشقاسینین گلمه‌سینه
نیه منیم آنام «مادر»
نیه آتام «پدر» – اولسون
بو دولاشیق تیجارتده
نیه منیم دوغمالاریم
اؤزگه‌سینین تاپداغین‌دا هدر اولسون
نیه یادین بهمزینه «بال» دئمه‌لی؟
اؤز آشیما «یال» دئمه‌لی؟
نیه منیم آنا دیلیم
گلمه دیلین قاباغیندا
تیتیم-تیتیم تیتره‌مه‌لی؟
نیه دوغمام یاد اولمالی؟
اؤز سؤزلریم اؤز دیلیمدن قووولمالی؟
هئچ گؤردونمو توراغایی
قارغا کیمی قا قا دئیه؟
هئچ گؤردونمو سیغیرچینی
سرچه کیمی جوککولدویه؟
سؤزلرینده میللت کیمی
اؤز از‌لی صیفتی وار
هر کلمه‌نین اؤز جؤوهری فطرتی وار
دییشنده یاد سؤزونه
اؤز سؤزونو اؤز لهجه‌نی
صیفتینی دییشیرسن
تانیمیرام اوندا سنی
آنلامیرام فطرتین نه صیفتین نه
گؤوشوینده سن اؤزگه‌نین سؤزلرینی
صیفت تاخدین صیفتینه
سن توپوردون اؤز بابانین اوجاغینا
آنان سنی بو اوجاغا اؤولاد دوغوب
سن‌سه گیردین اؤزگه‌سینین قوجاغینا
هر میللتین ان قیمت‌لی
ثروتی‌دیر آنا دیلی
اؤولادلاری یئر اوزونه سپه‌له‌نسه
پره‌ن-پره‌ن دوشه‌نلرین
وحدتی‌دیر آنا دیلی
بو دونیانین هانس اوزاق
قوجاغین‌دا سسلنرسه
او قوجاغی منیم اوچون
عزیزله‌دن آنا دیلیم
غربتی‌ده وطن ائد‌ن آنا دیلیم
سؤزلرینین نغمه‌سینده
روحوموزو جینگیلده‌دن آنا دیلیم
منی آنا وطنیمین
بوتون اوغول قیزلارییلا
قوهوم ائد‌ن آنا دیلیم
سن گؤزلره گؤرونمه‌یه‌ن بیر تئلسن کی
یول آچمیسان کئچمیشیمدن گله‌جه‌یه
آنا یوردون اؤز روحونو کئچیریرسن
بو نسیل‌دن او نسیله
او اورکدن بو اور‌یه
اؤز دردیمی سئوینجیمی
دوداغیمدا چاغلادانیم
منی آنا وطنیمه
بوگونومو صاباحیما
دونه‌نیمه باغلادانیم
ای سسیمه سس وئره‌نیم
سن ای منیم وارلیغیمی
یئر اوزونه گؤستره‌نیم
ای شرفیم ای بایراغیم
ای آنامین کیتابیندا آدی قالان
دوغما ایکن اؤگئی اولان سینه داگیم
ختایینین قیلینجیندا
فیضولینین غزلینده
بولؤولنیب اورخاولانان سؤز کسریم
داغلاریمدان دامجی-دامجی
سیزیب گلن اؤز اثریم
ای بو گونو دیلیم-دیلیم
پارچالانان آنا دیلیم.
سینه‌سینده اود قالانان آنا دیلیم.
قاپیلارین آرخاسیندا
بوینو بوکوک قالان دیلیم.
وار ایکن یوخ اولان دیلیم.
آیاقلاردا کیلیم دیلیم.
ووروشلاردا بیر قهرمان،
باریشلاردا حلیم دیلیم!
یادین فیتواسییلا اؤز گوللمیزله
اؤزگه‌نین دیلینه اوو اولان دیلیم
مهورلو حقوق‌لی ایداره‌لردن
داخمالار کونجونه قووولان دیلیم
عالی طبقه‌لر سنی داندیلار
سن بیر عمان ایکن سنی داندیلار
اؤزگه‌نین دیلینده خوروزلاندیلار
سن ای اؤز ساجین‌دا قوورولان دیلیم
ختایی تاختین‌دا سن فرمان اولدون
دیللره حکوم ائد‌ن قهرمان اولدون
بس نیه سن بو گون پریشان اولدون
بابک قیلینجیندان اود آلان دیلیم
تاریخین یولونو کئچدین اوغورلو
سنه باتاممادی بیر قولو زورلو
دونه‌نی محتشه‌م، صاباحی نورلو،
ایندی‌سی تاپدانیب اووولان دیلیم
آنالی، آتالی، آ یتیم دیلیم!
شرفیم، شهرتیم، غیرتیم دیلیم!