کولت.آذ گونئی‌لی شاعر آرش احمدی‌نین شعرینی تقدیم ائدیر:

ائشیتدینمی پنجره لرین سیخینتیلارینی
دینله دین هئچ دووارلارین سوکوتونو
تئلفونلارین سوسماسینی...
گؤردونمو آق کاغاذلارین تنهالیغینی؟!
گئجه نین داریخماغینی؟!
اوتاغین قبریستان رولونو اوینماغینیا,
اؤلدون هئچ؟!

اوتاغینداکی ساحیلی
گمی لرین اوزاقلاشماسینی
دوراقلاری
قاطار فیت لرینی
یوللاری
ساری تاکسی لاری
سن ده گؤردون,
اوتاغینداکی تارلارلارین یانماسینی
گونشین پنجره دن اه ییلیب باخماسینی
گؤی قورشاغینین آغلاماسینی...

باخ بولودلاردان دئییل
اوتاغیمداکی آینادی یاغیش یاغیر...
یئر کوره سی دئییل
باشیم دولانیر...

ترلی_ کیرلی بیر هاوا_
بیر آز قورخو,
بیر آز اونوتماق,
بیر آز اؤلوم_...

شاعیر هر گئجه یاتمادان_
اؤنجه سون شعرینی یازیر ...