کولت.آذ گونئی‌لی شاعر یعقوب نیکزاد-ین شعرینی تقدیم ائدیر:

توتولدو دولدو منیم داغ دومانلی دویغولاریم

لپیر -لپیر لپه لندی لیمانلی دویغولاریم

سوزالدی چنلی دوواقلاردا گؤزلرین گولوشو

ایتیردی سئوگی یولون دیک دابانلی دویغولاریم

سارای گؤیرتدی سئوینج اوسته چال ـ چاغیر گونونه

دیکلتدی آرپا چایین خان چوبانلی دویغولاریم

تیکینتی لرده تیفان قوپدو، سینسیدی کوچه لر

دوشنده دونیادا گؤزدن پیلانلی دویغولاریم

باهار عطیرلی سسینده قولاق یاتیرتمالییام

چیچک له نه دوداغیندا تیکانلی دویغولاریم

گیزیلده ین غزلیمدن تانی سینان سسیمی

قیلینجلانمادا گیزلین گومانلی دویغولاریم

قاییتمادیم اوزونه هئچ قیش اوزلو بیر پاییزین

یازا تامارزیلاییب ایستی قانلی دویغولاریم

گؤزللی گوزگویه قیسقانجیلیق اکیر یئنی دن

سینیقلیغا جان آتیر نردووانلی دویغولاریم

قلم دولومسولانیر دفتریم اوچوقلاییر آ...ه

جهننم اولمادا نهج الجینانلی دویغولاریم

گؤزللییی اوجا ساخلا آییق ـ دویوق اوره ییم!

یئتیشمه یینجه گونه پیلله کانلی دویغولاریم

سیزیلداماقدا یاریم جان ردیف و قافیه دن

سؤزومده گؤینه مه سالدی سوغانلی دویغولاریم