Kult.az آذربایجانین گؤرکملی خالق یازیچیسی سولیمان روستمین "تبریزیم منیم"شعیرینی تقدیم ائدیر:

باخدیقجا حوسنونه دویماییر گؤزوم،
تبریزیم، تبریزیم، گؤزل تبریزیم!

قویمارام یادلاری گیرسین قوینونا،
ایزین وئر قولومو سالیم بوینونا!
سنین بایرامینا، سنین تویونا
دیلی بیر، قانی بیر قارداشین گلیب،
دردینه آشینا سیرداشین گلیب.

سن چیخدین قارشیما دوزلا، چؤرکله،
باغیندان دردیین گوله، چیچکله،
ایکییه بؤلونمز صاف بیر اورکله،
تبریزیم، تبریزیم، آمان تبریزیم،
یوخ اولسون باشین‌دان دومان، تبریزیم!

قدرینی آیریلیق چکه‌نلر بیلر،
هیجراندا گؤز یاشی تؤکه‌نلر بیلر،
عؤمرونه قارانلیق چؤکه‌نلر بیلر،
باغین‌دان گول-چیچک دردیم، تبریزیم،
یئنه تزه‌لندی دردیم، تبریزیم!

نه قشنگدیر یول بویونجا سؤیودلر،
سؤیودلرین کؤلگه‌سینده ایگیدلر
بابالاردان دینلییرلر اؤیودلر،
جوشور دامارلاردا قانی، تبریزیم،
یوخدور بو مردلرین سانی، تبریزیم!

آغلاسان آغلارام، گولسن گولر م،
یاشاسان یاشارام، اؤلسه‌ن اؤلره‌م،
واریمی سنینله یاری بؤلره‌م،
گل بیر ده اوزوندن اؤپوم، تبریزیم!
باشینا گول-چیچک سپیم، تبریزیم!

ندیر او، معنالی، درین باخیشلار؟
ندیر گؤزلریندن یاغان یاغیشلار؟
ندیر قلبینده‌کی پاییزلار، قیشلار؟
یئتیمتک بوینونو بورما، تبریزیم!
ملول-ملول باخیب دورما، تبریزیم!

سنین چیچیینه، گولونه قوربان!
منه قارداش دئیه‌ن دیلینه قوربان!
وطنینه قوربان، ائلینه قوربان!
باخدیقجا حوسنونه دویماییر گؤزوم،
تبریزیم، تبریزیم، گؤزل تبریزیم!