کولت.آذ گونئی‌لی شاعیر عظیم غلامعلی پورون شعرینی تقدیم ائدیر:

گئجه كؤك سالديقيجاق ، يوخلوقا آلقيش دئيلير

وارليغا سئوگيه نفرت دولو قارقيش دئيلير

بوزوشور گؤزلريميزده ايشيقين ايستی ليگی

يازا ، ياز چرچيوه سينده ، قوزئيه قيش دئيلير

تكجه ميزلر ماسالار اوسته قورولموش شاها يوخ

بلكه آلماس تاجی باشيندا ، شاها كيش دئيلير

نعشه بازاريدی ، وارليق ، كوزه لردن آخيشير

خورنا چكمكده جاوانلار، قؤجيا ايش دئيلير

عجبا ، گؤر نئجه ، دوران دئيشيب گرديشينی !

هر اوزون بوغليا ، ساققاليا ، درويش دئيلير

واختيدير آغنيا ، داغلار سينه سيندن قايالار

ايندی قاران قوشا قيرقی ، قوشا ، بايقوش دئيلير !

كوهنه ليك كؤكله نير آرتيق ، ياخيلير فيكريميزه

تزه ليك لر سارالير ، سانكی خزانميش دئيلير

نئيله ايم ، شاختا سازاق تك ، منی سانجير باخيشين

گئجه آلقيشلاناراق ، گوندوزه ، قارقيش دئيلير

سحريم يان ، الوو آلسين گئجه لر هيكلينی

سانكی ، يانماق ، اونا ، ايللردی ، پئشه ايميش دئيلير

(سحر)