کولت.آذ گونئی‌لی یازار فرخ جرایدینین "ایکی شعیرنی" حکایه‌سینی تقدیم ائدیر:

بو گون سحردن ساعات اون‌بیره کیمی لاپ بوشونا فحله میدانیندا دورموشدو. اؤزوندن سونرا نئچه نفر ده اؤزونه تای قارا فحله اونونلا بیرگه گون‌اورتا چاغینا قدر هاوانین سویوغوندا میدانین قیراغیندا دایانیب دانیشماقلا باشلارینی قاتمیشدیلار. دئیه‌سن هئچ‌ کیم بونلاری گؤرمه‌میشدی. ساعات اون ایکی چئوره‌سی‌ایدی هامی داغیلیشدی. بیر میدان ماشینلارینین نریلتی سسی قالدی، بیرده "ائلیار".

ائلیارین ۴۶ یاشی وار ایدی. ائولی ایدی، ایکی اوُشاق آتاسی.

آرتیق آلتی- یئددی آی اولاردی کی ایش‌سیزلیق ایدی. دئیه‌سن بو اؤلکه‌ده هئچ کیم دام- داش ایشلتمیر. دا چؤمچه قازانین دیبینه دَییردی ائلیارین بوش جیبلرینده. بانک-ا ائو اجاره‌سینی اؤده‌مک اوچون قویدوغو بئش میلیوندان سووای، جیبینده هئچ نه قالمامیشدی. دَرین بیر آه چکیب قابارلی سول الین سول دیزینه قویاراق ساغ اَلی ایله یئردن ایش تورباسینی گؤتوروب آیاغا قالخدی. یاواش- یاواش یولا دوشدو بیر آیاق گئتسئیدی او بیری آیاغی دایانیردی.

یولو گئتدیکجه ائوینی دوشونوردو. ائوده بیر ‌آز پنیر- چؤرک، بیر ده کئچن هفته آلدیغی یئرآلما، سوغانلا ایکی کیلو دویو وار ایدی، داها هئچ نه.

سارای‌ین سؤزلری یادینا دوشدو:

«حتمن یاغ آل ها! هئچ اولماسا بیر ائونه دورمانج* ائلرم اوُشاقلار یئییب، باشلاری قاریشار.»

اونا دا پول یوخ ایدی. یاغ-ین قیمتینی نئچه یئردن سوروشموشدو. بورداکی ساتیش یئرینده هر یئردن اوجوز ایدی، ۱۹۵۰۰ دئییردی.

بونلاری دوشونرک گئدیردی، بیر آن دالیدان سانکی بیری "هوی، آی کیشی، ایشچی؛ آی... سنله‌یم" دئییر، ائشیتدی؛ دؤنوب آرخاسینا باخدیقدا گنج بیر اوغلانی گؤردو: «بویورون » دئیه اوغلانا ساری یئیین آددیملارلا گئتدی. اونا چاتاراق:

-اَمریز اولسون، دئدی.

-بیر متر قازیلمالی یئریمیز وار. قازا بیلرسن ؟ گئدک؟- اوغلان دئدی.

-اولسون!- دئیه ائلیار جاوابلادی.

پول دانیشمادی، دوغروسو دانیشا بیلمه‌دی. "هر نه اولسا، هئچ‌دن یاخشی‌دیر." دئیه سسینی چیخارتمادی.

اوغلانین ماشینینا مینیب گئتدیلر، اوزاق دئییلدی. چاتدیقدا، ائلیار هر نه‌یی یئرده حاضر گؤردو هم بئل وار ایدی هم کولوک. اؤزلری یئری بیر آز دئشمیشدیلر آما ایشی یاریمچیلیق بوراخیب گلیب ائلیارا توش گلمیشدیلر.

-بورادی، سو لوله‌سی پارتلاییب اوستون آچسان بیزی گؤرر.- اوغلان دئییب، ائوه کئچیب گئتدی.

ائلیار کولونگو گؤتوروب بیر ساعات چکمه‌دن اورانی قازیب بوشالتدی. دوغروسو هئچ ایشده تونتونمزدی. اوغلانی چاغیراراق: -آغا قورتاردیم گلین باخین.

-ساغ اول اوستا! اللرین آغریماسین. نئچه اولدو؟

بیر آز فیکیرلشیب:

-نه شیش یانسین نه کباب، آلدیغیم دا حلال اولسون، سن ۲۵ مین وئر.- دئدی.

-بابا دا بئش مین نه‌دی اوستا؟! ائله ۲۰ وئردیم حسابا دا دوز گلسین.

دئیه‌سن ائلیارین دیلی توتولموشدو هئچ نه دئمه‌دن اییرمی مینی آلیب آیریلیب، بیر باش ساتیش یئرینه گئتدی یاغ آلماغا.

دکانا گیریب یاغلارین اولدوغو یئری بیله‌رک، بیر آز او یان- بو یانا باخدی؛ یاغی آلدی، سانکی قیمت‌دن خبری یوخدور "نئچه اولدو؟" دئیه سوْروشاراق، ایکی اون مین تومنلیک پولو ساتیجی‌یا وئردی.

-قارداش باغیشلا خیردا یوخوم، گل بو ایکی شیرنی بئش یوزه.- ساتیجی دئیه‌رک، ائلیارا الینی اوزالتدی.

سس‌سیز دکاندان ائشیگه چیخدی، ساغ الینده ایش تورباسی، سول الینده نایلون توربادان آسیلمیش یاغ، جیبینده ایکی شیرنی، بئینینده بیر چوخ دوشونجه.

یئریه- یئریه ائولرینه ساری یولا دوشدو. قاپینی آچیب ائوه گیردیکده:

-سارای! سارای! دا تئز گل بو گون اؤلوم قالیب یول یئریمکدن.

سارای گلیب ائلیاری قارشیلادی، اونون الینده یاغی گؤردوکده گؤزلری ایشیقلاندی:

- نییه ایش یوخ ایدی؟- دئدی.

- اَه! آز-ماز ایشله‌دیم گؤروسن دا - یاغی گؤرسه‌دیب، اَل آتیب جیبینده‌کی شیرنی‌لری چیخارداراق:

- بئش یوزو خط بیلیتینه حسابلامیشدیم، اونا دا بونلاری وئردیلر پیادا گلدیم!

- ائله جانیندان!- دئیه سارای گولومسه‌ییب شیرنی‌لری ائلیارین اَلیندن آلدی.