بیری وار ایدی، بیری یوخ ایدی، کئچمیش زامانلاردا ایکی اوزاق قوهوم وار ایدی. بونلارین بیری یوخسول ایدی، اؤزو ده مئشه‌ده، بالاجا بیر داخمادا اولوردو. او، بیری دؤولت‌لی ایدی، شهرده، قشنگ، بؤیوک بیر ائوده یاشاییردی. گونلرین بیر گونو یوخسول مئشه ایله گئدیردی، بیردن آغاجین آلتین‌دا پاریل‌دایان، قیزیل بیر للک گؤردو. باشینی قالدیریب یوخاری باخ‌دی، گؤردو کی، آغاج‌دا قویروغو قیزیل بیر خوروز اوتوروب. یوخسول قیزیل للیی گؤتوروب بیرباش شهره، دؤولت‌لی قوهومونون یانینا گتیردی.

دؤولتلی قیزیل للیه باخیب دئدی:

– گؤزل شئی‌دیر! آنجاق دیری چوخ آزدیر. من سنه بو للک اوچون بیرجه مانات گوموش پول وئرره‌م.

یوخسول ایسه عؤمرون‌ده قیزیل گؤرممیش‌دی، اونا گؤره ده بیلمیردی کی، بو للک خالص قیزیلداندیر. او ائله بیلیردی کی، بو نه ایسه قشنگ پاریلدایان بیر شئی‌دیر. اونا گؤره ده او ائله بیلدی کی، اونون قیزیل للیی اوچون گوموش پول یاخشی قیمتدیر.

یوخسول کیشی او بیری گون یئنه ده مئشه‌یه گئتدی، همین آغاجین آلتیندان یئنه ده قیزیل للک تاپدی. اونو گؤتوروب دؤولتلینین یانینا آپاردی، یئنه ده اوزین‌ده گوموش پول آلدی. بیر نئچه گون دالبادال بو احوالات بئله باش وئردی.

بیر دفعه ده یوخسول همیشه کی کیمی آغاجین آلتینا گلدی، گؤردو کی، قیزیل قویروقلو خوروز برکدن بانلاییر:

– کیم منیم اورییمی یئسه، او آدام هر گون بالیشینین آلتیندان ایکی قیزیل یومورتا تاپاجاق! کیم منیم اوریی‌می یئسه، او هر گون بالیشینین آلتین‌دان ایکی قیزیل یومورتا تاپاجاق!

یوخسول بو ایشه لاپ مات قال‌دی، تئز شهره قاچیب احوالاتی دؤولتلی و آجگؤز قوهومونا دانیشدی. او ایسه جوابین‌دا دئدی:

– اگر سن او خوروزو منیم اوچون توتا بیلسن، سنه اونون اوچون مین گوموش پول وئرره‌م!
یوخسول اونونلا بئله شرط کسدی:

– سنین پولون منه لازیم دئییل! یاخشی‌سی بودور کی، منیم ایکی اوغلومو اؤز یانینا آپاریب اونلارا اؤز اوشاقلارین کیمی باخ. من ایستییرم کی، اونلار عقل‌لی و ساوادلی اولسونلار.

دؤولتلی او ساعت سؤز وئردی کی، یوخسولون اوشاقلارینی یانینا آپارار و اونلاری اوخوماغا قویار. بونون اوزین‌ده ده یوخسول کیشی دؤولتلییه سؤز وئردی کی، قیزیل قویروقلو خوروزو اونون اوچون توتسون.

یوخسول سحر تئزدن مئشه‌یه، همین آغاجین آلتینا گل‌دی. قشنگ خوروز دینمه‌دن یوخاری‌دان اونا باخیردی. یوخسول نیشان آلیب اوخلا قیزیل قویروقلو خوروزو ووردو. یوخسول کیشی خوروزو گؤتوروب اوغلانلارینا وئردی، اونلاری شهره، دؤولتلی قوهومونون یانینا گؤندردی.

دؤولتلی قیزیل قویروقلو خوروزو گؤروب سئوینجین‌دن آتیلیب-دوشدو. او، اؤزو خوروزون قیزیل للکلرینی بیر-بیر یولدو، سونرا اونو یوخسولون اوغلانلارینا وئردی کی، خوروزو بیشیریب ناهارا اونا وئرسینلر. او، اؤزلویونده بئله قرارا گلمیشدی کی، یوخسولون اوغلانلارینی درسه گؤندرمه‌یه‌جک: قوی اونون یانیندا قالیب نؤکرچیلیک ائلسینلر!

اوغلانلار مطبخه کئچیب خوروزو بیشیرمه‌یه باشلادیلار. اونلار چالیشیردیلار کی، خؤرک دادلی اولسون، دؤولتلی قوهوملاری راضی قالسین. آنجاق بختلری گتیرمه‌دی: خوروز بیشیب لاپ حاضر اولانا یاخین، اتین سویو بیردن قازاندا پیققاپیق قاینادی، خوروزون اوریی سیچراییب بیرباش دؤشه‌مه‌نین اوستونه دوشدو!

– وای، بو نه بلادیر باشیمیزا گلدی! – دئیه بؤیوک قارداش دیللندی. – ایندی گرک خوروزون اوریینی توللایاق. بیر باخ ها، لاپ چیرکلی دؤشه‌مه‌نین اوستونه دوشوب. ایندی اونو گؤتوروب آغامیزا وئره بیلمریک.

کیچیک قارداش ایسه یالواردی:

– خوروزون اوریینی توللاما! من سحردن هئچ بیر شئی یئممیشم. یاخشی‌سی بودور کی، گل اونو گؤتوروب یویاق، اؤزوموز یئیک.
قارداشلار بئله ده ائلدیلر: خوروزون اوریینی یویوب ایکی یئره بؤلدولر، هره بیر پارچاسینی یئدی. سونرا دا بیشمیش خوروزو دؤولتلی قوهوملارینین یانینا آپاردیلار.

دؤولتلی او ساعت باشلادی بوشقابین ایچینی قوردالاماغا کی، خوروزون اوریینی تاپسین. آختاردی، آختاردی، خوروزون هامی‌سینی یئدی، آنجاق اوریی هئچ یئرده تاپمادی. اوندا دؤولتلی، اوزونو قارداشلارا توتوب سوروشدو:

– خوروزون اوریی هانی؟ اونو نئیلمیسینیز؟

قارداشلار بو واخت احوالاتی اولدوغو کیمی اونا دانیش‌دیلار. تاماهکار دؤولتلی اونلارین الین‌دن ائله حیرسلندی کی، آغاجی گؤتوروب اونلارین ایکی‌سینی ده ائوده‌ن قوودو. قارداشلار آغلایا-آغلایا مئشه‌یه، اؤز یوخسول، بالاجا کومالارینا قاییتدیلار. اونلار هئچ باشا دوشه بیلمیردیلر کی، بیر خوروزون اوریی ندیر کی، اونون اوستونده دؤولتلی بو قدر حیرسلنیب اونلاری ائویندن قوودو.

گئجه کئچدی، سحر قارداشلار هره‌سی اؤز بالیشینین آلتیندان بیر قیزیل یومورتا تاپدی. اونلار قیزیل یومورتالاری دا گؤتوروب آتالارینین یانینا گئتدیلر و باشلارینا گلنی اونا دانیشدیلار.
آتاسی اونلارا دئدی:

– منیم او دؤولتلی قوهومومدان اورییم برک اینجیدی، سیزی ائویندن قوودوغو اوچون من بو پاریلدایان یومورتالاری هر کس اولسا ساتارام، تکجه اونا یوخ.

ائله بو واخت یاخین‌لیق‌دان گزرگی بیر تاجیر کئچیردی. یوخسول کیشی یومورتالاری گؤتوروب اونون یانینا گئتدی. تاجیر دئدی:

آ، بو یومورتالار خالص قیزیلدیر کی! من بو قیزیل یومورتالارا گؤره سنه یاخشی پول وئرره‌م.

تاجیر بونو دئییب یوخسولون اتیینه او قدر پول تؤکدو کی، او، هئچ عؤمرون‌ده بو قدر پول گؤرممیشدی.

یوخسول کیشی آنجاق ایندی باشا دوشدو کی، دؤولتلی قوهومو اونو همیشه آلدادیرمیش – قیزیل للک اوچون اونا گوموش پول وئریردی.
«عیبی یوخدور! – دئیه یوخسول اؤز-اؤزونه دوشوندو. – بیزلرده بیر مثل وار، دئیرلر کی، باشقاسینی آلدادان اؤزو ده آلدانار. ائله بئله ده اولدو.
او گوندن بری قارداشلار ایکی‌سی ده هر گون بالیشلارینین آلتیندان بیر دنه قیزیل یومورتا تاپیردی. آتاسی بو قیزیل یومورتالاری یاخشی قیمته ساتیردی. اونلار ایندی لاپ یاخشی دولانیردیلار. آنجاق ان باشلیجاسی او ایدی کی، قارداشلار اؤز آرزولارینا چاتمیشدیلار: ایندی اونلارین ایکی‌سی ده علم اؤیره‌نیردی و خئی‌لی شئی ده اؤیره‌نه بیلمیشدیلر.