کولت.آذ گونئی‌لی شاعیر و یازار ووقار نعمتین "قاضی آغام" یازیسینی تقدیم ائدیر:

نه وار کی بوندا!

سؤزلر ده قابیق‌دان چیخیرمیش قاضی آغام!

ایچی بوشالدیلیرمیش قاوراملارین!

بوگون بیر سؤز قابیغینا راستلادیم بولواردا

«گل اوتوردان دور گئت آنلا،

دور گئت‌دن گل اوتور» دئمیش بابالار

نه گؤزه‌ل دئمیش‌لر باخ‌سانا!

دئییلمی قاضی آغام؟!..

نه وار کی بوندا!

سنی دینله‌مکدن یورولدوم قاضی آغام!

پَخمه سورولار سورورسان آداما

بیرآز دا من سوراییم ایندی،

سن قولاق آس منه؛

نه‌وار کی بوندا قاضی آغام!

سؤیله بی هله،

آج قالدین‌می، سوسوز قالدین‌می هئچ سن؟!

قوخلادیغین اولدومی بیر مکتوبو چیچک یئرینه؟!

آغلادین‌می هئچ بیر یورقانی چکیب باشینا؟!

هله دوغروسو،

سن ده آدام‌می‌سان،

آدام‌می‌سان قاضی آغام؟!

عاشیق اولدوغون گئجه‌لرده،

سیگاراسیز قالدینمی هئچ سن قاضی آغام؟!

آناسینی سؤیدونمو حیاتین؟

آجیدین‌می اوره‌کدن،

جانین یاندی‌می هئچ سوکاک پیشیک‌لرینه؟!

بیر یئتیم‌له پایلاشدین‌می اَکمه‌یینی؟

الینی توتدون‌می بیر ییخیلانین؟

مثلا خیابانی آدلاتدین‌می بیر قاری‌نی؟

پاران یوخدور دئیه؛

واز کئچدین‌می هئچ

دونیالار قده‌ر سئودییین بیر قیزدان؟!

نه وار کی بوندا!

بوندا نه وار کی قاضی آغام!

جریمه یازدین، جزا یازدین،

زیندان یازدین، شاللاق یازدین

سورگون یازدین، اعدام یازدین!

بیر شعر ده یازدین‌می هئچ قاضی آغام؟!

اؤرنه‌یین خیاوان ایت‌لرینه،

یا آرابا آتلارینا،

آلنی‌نین او سویوق ترینه،

بیر اؤیکو یازدین‌می؟

اللرین اوتاندی‌می بالاجا قیزیندان؟

ترئن‌لر کئچدیمی اوره‌ییندن؟

دیک باخا بیلدین‌می بیر کره

گوزگولرین اوزونه؟

دوست اولدوغون اولدومی هئچ بیر آغاج‌لا؟

دردلرینی،

بیر آغاجا سؤیله‌دین‌می مثلا؟

آدام گتیردییینی گؤردونمو قورو بیر آغاجین؟

ایزله‌دین‌می،

ایزله‌دین‌می بیر گؤیرچینی قاضی آغام؟

باشی‌نین اوستونده،

بؤیله‌سینه فیرلانیب-فیرلانیب

یوخ اولونجایا قده‌ر

ماوی گؤی‌لرده؟!...