کولت.آذ گونئی‌لی شاعر تایماز میانالی‌نین شعرینی تقدیم ائدیر:

اوچدو گؤزلريمده سئوگى ائويميز
داغيلدى كرپيجى وئرانا قالدى
سحرلر اوخشاديم اؤلن سئوگيمى
قانداللى باخيشيم دومانا دالدى

ندنسه ندنسه گؤرمورم سنى
باخيشيم تيكيليب اوفوق دالينا
بيليرم گئدركن گؤرمه‌دين منى
قار توتموش كؤنلومون داغ ماحالينا

ياغدى گؤزلريمدن قانلى بنؤوشه
ياشاديم دردلرى ، ياشاديم سن‌سيز
اوره‌ييم اود دوتدو دؤندو آتشه
بيلمه‌ديم گئتدين‌مى هارايا من‌سيز

سايمادين باشيما نه گله‌جكدى
نه مندن اوتاندين نه‌ده آللاهدان
قاشلارين بيلميرم نه چكه‌جكدى
بو سونكو ائتديى قانلى گوناهدان

كدرلى گونلريم هله‌ده ياشار
آغلايا آغلايا قارا گؤزونو
تايمازین دردلری گؤزوندن داشار
كيم چاتديراجاقدير سنه سؤزونو؟...