Kult.az نصرت کسمنلینین "سن دئمه تزه‌دن سئومک اولارمیش.."شعیرینی تقدیم ائدیر:

سن دئمه تزه‌دن سئومک اولارمیش،
تالع ده تزه‌دن گوله بیلرمیش،
کوسوب گؤزویاش‌لی گئدن محبت
پشیمان-پشیمان دؤنه بیلرمیش.

اورک بولود کیمی بوشالیرسا دا
دئمک بولود کیمی تزه‌دن دولور.
سونونجو شؤله‌سی تیتره‌یه‌ن شام‌دان
آیری بیر شامی دا یاندیرماق اولور.

سن دئمه تزه‌دن سئومک اولارمیش،
کؤهنه یارالاری واخت، زامان سیلیر،
کسیله‌ن بوداقلا اؤلن آغاجلار
تزه پؤهره‌لرله دیریله بیلیر.

آغلایا-آغلایا دونیایا گلیب
بیز آنا سودویله گولممیشیکمی؟!
هر آخشام ساپساری باتان گونشی
هر سحر تزه-تر گؤرممیشیک‌می؟

سن دئمه تزه‌دن سئومک اولارمیش،
سئوگی فورصت دئییل قوش کیمی اوچا.
نه ده کؤلگه‌دیر کی،
قاچاسان قووا،
یا دا سن قوواسان
او سن‌دن قاچا…

چیخارسان قلبین‌دن اؤتن سئوگینی،
بیر گون ده تنهالیق سیخاجاق سنی.
کیمه‌سه ائتدیین یاخشی‌لیق کیمی
محبت قارشینا چیخاجاق سنین.

ایلک سئوگی یووادان دوشن قوشجوغاز،
کؤرپه قانادلاری پؤهره‌له‌نمه‌ییب.
مجنونون آهییلا اوچان محبت
مین هیله الیله یئره ائنمه‌ییب…

من کی گؤرممیشم سئوگینی سوسان،
محبت زیروه‌ده بسلنه‌ن قارمیش.
کیم دئییر بیر دفعه سئویلیر اینسان،
سن دئمه هر زامان سئومک اولارمیش…