کولت.آذ گونئی‌لی شاعر و یازیچی حسرت زنگانلی‌نین یازیسینی تقدیم ائدیر:

بیزیم کندلی رحمتلیک میرزا فرضی آدلی کیشی نین ایکی اوغلو کامال و جامال آدیندا اولدوق‌دا هئچ بیری ائولنمه میش ایدی.

کامال ۳۲ یاشلی و جامال ۸ یاش اوندان کیچیک ایدی.

گونلرین بیر گونو من ایله کامال (بؤیوک قارداش) کندیمیزین خرمن لرینده ، من بؤیوک بابامین و او اؤز داوارلارین بیر بیرینه قاتیب یاییردیق.

گون اورتا چاغی چاتمادان ، کامال دئدی : داوارلاری آپاراق ائوه ، سو ایچسین لر و اؤزوموزده بیر قاشیق چؤرک یئییب یئنه گون اورتادان سونرا داوارلاری گتیرک.

منده گؤیول وئره رک بیرلیک ده داوارلاری کندین ایچینه ساری سوروب گتیریردیک.

کندین یوخاری آراسی نین دؤنگه لریندن داوارلاری ساووشدوراراق گؤردوک جامال (کامالین کیچیک قارداشی) دالیندا بیر جمه یونجا ایله غسالخانا یانیندان بیزه یاخینلاشیر.

دایاندیق گلدی بیزه چاتدی و بیر سلام وئریب ساووشدو.

بو آندا کندلی لریمیزین بیری بیزیمله اوز اوزه گلدی و منله گؤروشدو و کئف احوال خبر آلما آراسی ، کامال جامالی چاغیردی و اونا ساری قاچدی.

من کندلی ایله دانیشا دانیشا بیر آن گؤردوم کامال جامالی آلدی یاتدی یئره.

توز توپراق گؤیه قالخدی

کامال ال آغاجی ایله دوشموش ایدی جامالین جانینا و اونا کؤتک...!

من و کندلی میز قاچدیق اونلارا ساری ، مگر کامالی جامال دان آییرماق اولوردو.

وورا وورا ائله بونو دئییردی: آرواد ایسته ییرسن ایندی؟

اوتانمیرسان؟

مین یالواریشلا کامالی جامال دان آییردیق.

جامال حیران قالاراق، یئرده توز تورپاق ایچینده بیزه و قارداشینا باخیردی.

کامال ائله دئدیگی سؤزو یئنه دئییردی:

اوتانمیرسان

آرواد ایسته ییرسن؟

آغزیندان سوت اییی گلمیر میه؟

کندلی میز کئچدی جامالی یئردن قاووزادی.

منده کامال دان ، جامالین وورماغی نین سببین سوردوم.

کامال حیرصلی حیرصلی دئدی:

گؤرمورسن؟

توکلرین (ساچلارین) وئریب یوخاری

آغا آرواد ایسته ییر

اوتانمیر!

بؤیوک‌قارداش ائولنمه میش بو یئریندن چیخیب.

جامال بو سؤزو ائشیتدیک‌ده ، آغزی نین سویون یاخیردی الینه و توک لرین اشاغی وئریب دئییردی : کامال باغیشلا ، باخ واللاه وئردیم اشاغی.

دای یوخاری وورمارام دئیه یونجانین جمه سین دالینا ووردو و قاچدی.

منده بو آرادا گولمک دن اوغونوردوم و کامال دا منه باخیب باشین توولاییب دئییردی : منه آغیر گلیر داااا نیله ییم ، دایان اونا دئیه رم ، قوی چاتیم ائوه.

او زامان دویدوم بیزیم کند ده توک لرین (ساچلارین) یوخاری دارایان آرواد ایسته‌مه یین بللی ائدیر!