کولت.آذ گونئی‌لی یازار فرخ جرایدی‌نین "چیلله گئجه‌سی" آدلی حکایه‌سینی تقدیم ائدیر:

" دیررررررررررررررررررر " جیب تلفونونون چالاری سسلندی، بیر-بیر گؤزلرینی آچاراق یوُخودان دوُروب ال آتیْب چالاری باغلادی، کلاسیک لری سئوردی ائله اوْ اۆزدن بو بئیین آپاران سسی اوْیانما چالاریْنا قوْیموشدور.

ساعت ۴:۳۵ ایدی، قالخیْب سماورین آلتیْن اوُجالتدی. سماور قاینارا گلینجه ال-اۆزونو یوُیوب گئیینمیشدی. چای دمله‌ییب ایکی‌سین ایچدی بیر تیکه چؤرک‌ده آغزیْنا قوْیوب آیاغا دوُردو.

اؤنجه اوُشاقلارین اۆستونو چکیب یاواشجا ۱۳ یاشلی دوُیغونون ساچلارینا الینی چکدی لاپ ائله آناسینین ساچلاری کیمی ایدی قارا، اوُزون، تیترک. سونرا ۶ یاشلی آیهانی یاواشجا اؤپۆب آیاغا قالخدیْ. گؤزگۆنۆن اؤنۆنده دایانیْب سئیرک ساچلارینی دارادی. داراغی یئره قوْیوب گؤزگۆنۆن قیْراغیندا اوْلان عکسی الینه گؤتۆردو. گئنه گؤزلری دوْلدو، بیر داملا یاش ساغ گؤزۆندن یاناغیْنا آخدی. عکسی گؤز اؤنۆنه توُتوب بیراز باخدیْ، اۆزۆنه ساری چکیب یاواشجا یاناغیْندان اؤپدۆ عایله‌سینی بیر یوْللوق بوُراخیْب تانری‌یا قوْووشان حیات یوْلداشی ساییلان اؤزله‌می. بیر ایل ایکی گۆن اولموشدو اؤزلم‌سیز یاشاماغی، آما هر بیر گۆنو بیر ایل کئچمیشدی سۆروجو سهنده.

اؤزله‌می چوْخ سئودیگیندن دوْلایی دئمیشدی " داها ائولنمه‌یه‌جه‌یم " آما ایکی اوُشاقلا یاشامینی چوْخ چتین کئچیریردی.

عکسی یئرینه قوْیوب آرابانین آچارینی الینه آلیب پله‌لردن ائندی. آرابانی ایشله‌دیب یاواش-یاواش یوْلا دۆشدۆ. گئجه یاغان قار یئرده دوْنموشدو، یئر بوُز ایدی. آرابانین تکرلری خاریْلدایا-خاریْلدایا آسفالت اۆزره یوْل آچیْردیلار. سهندین بئینینده اؤزله‌مین اؤلۆم آنی جانلانیردی، توْولا گلن آرابا بوُزلارین اۆستونده دوُرا بیلمه‌ییب خاررا-خار بوُزلاری ازیب اؤزله‌مین گؤوده‌سینی یئره چیْرپدی.

سهند ساغ-سوْلونا باخا-باخا گئدیردی بلکه بیر یوْل اۆسته یوْلجو گؤرسۆن دئیه. هاوانین آلا قارانلیْغیندا بیر نفر ال ائله‌ییب " بازار " دئدی، یاواشجا آرابانی ساغا چکیب میندیردی.

یوْلجو: " سلام قارداش، آللاه ایشله‌رینی راست گتیرسین، لاپ دوْنموشدوم. " دئدی.

سهند ایسه " هه هاوا یامان سوْیوقدور " دئدی " با دا چیللـه‌دی داااا. "

" هه دۆز دئییرسیز. "

کئچن چیللـه‌دن آیهانا بوْرجلو قالمیشدی، چیللـه قارپیْزین، پشمک بیرده پخله‌نی.

گۆنۆ ایشله‌یه-ایشله‌یه آخشام ائله‌دی، هر گۆنه تای آرادا بیر-ایکی دؤنه‌ده ائوه گئدیب اوُشاقلارا باش چکدی، دوُیغو گۆن اوْرتایا کیمی اوْخول‌دا اولوردو آما آیهان ائوده، دۆزدور آتا-آناسی اوُشاقلارین یانیندا ایدی آما اؤزۆنۆن اۆره‌گی دؤزمزدی.

آخشام ائوه گلدیکده ایلک گئدیب بیراز میوه، ایری بیر قارپیْز، بیر کیلو پخله آلدیْ، سوْنرا آجیلچی دکانینا گیریب سیمیشقا، گیرده‌کان، بادام بیرده بیر وانیل‌لی ایله بیر زعفرانلی پشمک آلیب ائوه ساری گئتدی.

ائوه گیردیکده آیهان قارشیلاییب " آتام منه قایپیز آلیْب " دئیه سئوینجدن آتیْلیب دۆشۆردو. آناسی گلیب یاردیْم ائتسین دئیه میوه‌لری سهنددن آلدیْ. گؤزۆ پشمک‌لره ساتاشدیقدا " اح بیلیرسن دا هئچ کیم زعفران‌لی سئومیر، دا نییه آلیْردین؟ " دئدی" بیر وانیل‌لی پشمک قالیْردی دئدیم بیری آز اوْلار اوْ اۆزدن. " یالان دئدیگی بللی ایدی، اۆزو پؤرتمۆشدو، آنا دا دینمه‌دی.

گئجه شامدان سوْنرا میوه، آجیل له پشمک‌ گتیریلیب دؤشندیکده، سهند قالخیْب گؤزگۆنۆن قیْراغیندان اؤزله‌مین عکسین گتیریب ماسانین اۆستونه قوْیاراق زعفران‌لی پشمگی‌ده عکسین اؤنۆنه قوْیدو " اؤزلم زعفران‌لی پشمک‌لری سئوردی " دئییب گئنه گؤزلرینی دوْلدوردو.