کولت.آذ گونئی‌لی شاعر آرش احمدینین شعرینی تقدیم ائدیر:
من و سن
دؤنه لرجه
آغریلاریمیزی اونوتموشدوق کافه لرده
داریخمالاریمیزی کؤلگه لریمیزه دانیشمیشدیق...
سنین دؤنه لرجه بارماقلارین قانامیشدی
کیلاوییه لرین تتیینده
منیم نئچه دؤنه آغزیم بولاشمیشدی قانا
شعریمی اوخودوغومدا...
خاطیرلاییرسان!
سن موسیقی ایله
من شعرله
گئجه لریمیزی بؤلوشوردوک...
یادیندامی نازلیم...
کئچمیشمیزدن قاچماغی
گله جه ییمیزی اؤلمه یی
سن
آرابانی مینیب دونیانین سونونا گئتمه یی دوشونوردون
منسه آغاجلارین آیاق اوسته اؤلومونو...
هر گون سورگون دوشوردوک بو شهره
دئیه بیلمه دییمیز سؤزلری
دایانا بیلمه دییمیز دپوارلاری
سوکوتلارین تنهالیغینی_
اؤزوموزو دینله ییردیک
اوزوموزدن اوزاقلاشیردیک
اوزوموزه دایانیردیق...
اؤزوموزدن کوسوردوک
اوشاق اولوب آغلاییردیق
تنهالیغی اؤیره نیردیک
پنجره آچیق اوچا بیلمیردیک
قاپینی آچیب
دیشارییا چیخیب
اؤزوموزو ترک ائدیریک...
شوبهه سیز
من سن دئییلم
سنده من دئییل سن!
اما ایکیمیزده سئوینج دن آغلاماغی داریخیریق_
بو آغریلار سونا گلسین
یاغیش آلتیندا
بیر اوزون خیاواندا
تک آددیملایاراق
بیریسینی داریخیریق_
بیزیم طالعیمیز چولاق دیر
اؤلومله یاشامین اورتاسیندا
قالیریق...
چاتا بیلمه ییریک...
باخ
آزر آیی دیر
پاییز دورنالاری اوچوشور
بیر آز کؤچمک هاواسی
بیر آز آیریلیق قوخوسو
بیر آز اوشومک...
قارانلیق اودا
سن پییانووو
منسه شعریمی
قوجاقلاییب یاتیریق...
قیشی سلاملاشیریک!