نیمتاجین سول معاوینی شلاله ایله بیرلیکده قمرین آپارتمانینا کئچدیک. بونا باخمایاراق کی آمازون دول‌لاری‌نین هئچ بیری اونونلا گل- گئدی یوخدور، آمما قمر ناقافیل اؤلومه گؤره قاپیسینی ایچریدن قیفیللاماز.

«دئیرم بیردن اؤلرم هئش کیمین خبری اولماز. ایسته‌میرم جنازه‌ام نئچه گون اتاقدا قالیب، لئش کیمی اییلنسین.»

قاپینی آچماق همن پیس بیر اییی بورنوما دولدو. دییه‌سن قمرین قورخدوغو باشینا گلیب، هم ناقافیل اؤلوب، هم ده جنازه‌سی اییله‌نیب. دول‌لار بیر به بیر بیزیم آرخامیزجا اونون کیچیک آپارتمانینا گیردیلر. اونون آپارتمانی باکیره دول‌لارین بؤولومونده‌دیر. مجتمعین تلویزیون سالونوندا قمر چوخ واختلار گلیب کناریمدا اوتوراردی. او آیری دول‌لار کیمی تلویزیون ماراقلیسی دئیلدی، یالنیز ائشیدن بیر قولاق تاپماق اوچون سالونا گلردی. سالوندا بیرینی تاپیب، اوخودوغو کیتابلاردان دانیشیب، فیلمدن، موسیقیدن آلدیغین لذتی آدامین بورنوندان گتیرردی. اونون عادتی ایدی هر هانسی کیتابی اوخوسایدی، او کیتابین کاراکترینی اؤز قیلیغینا گیردیریب اونون کیمی یئییب، ایچیب، دانیشاردی. درمان شوپنهاور کیتابینی اوخویاندا ایت ساخلاماغا علاقه تاپمیشدی. شوپنهاور کیمی ایت‌ین خالتاسیندان یاپیشیب، هر گون ناهار یئمه‌یی یئمک اوچون مجتمعدن اوچ خیابان اوزاقلیقدا بیر رستورانا گئدیب، ایکی پُرس یئمک یئییردی. اتاغیندا ایت ساخلاماعینا گؤره نیمتاج ایله بؤیوک داعوالاری چیخمیشدی.

نئچه واخت ایدی اسپینوزانی اؤز قیلیغینا گیردیرمیشدی. آز یئییب، ایچیردی. اسپینوزانین آلـلاهینین بحرینه گئتمیشدی. اوچ گون قاباق سالوندا گلیب منیم یانیمدا أیلشمک همن دئدی: «بولوسن ندی؟ اسپینوزا منیم بؤیوک موشوکولومو حل ائله‌دی.»

فئری‌نین قولاغی گئنه سس تونلارینی گؤیدن قاپدی. مندن قاباق اورتایا آتیلیب دئدی: «اسپینوزا کیمدی؟ هننننن!...دئه دا، دییه‌سن آتدان آتدان ایشلر گؤروسن ها؟ دا بو دفه غیابی عقد- مقد ائله‌مه‌ها، آدام ایکی یئردن سانجیلماز...»

قمر کاناپا اوستونده، اسپینوزا مسئله‌سی کیتابی دؤشو اوستونده اوزاناقلی قالیب. کیتاب توتدوغو أللری ده اوزونون دریسینه تای گچ کیمی آغ‌آپباغدی. گؤزلری یومولودور. دینج یاتمیش بیر آدام کیمی گؤرکمی وار. اؤزلویومده فیکیرلشیرم: «گؤره‌سن اؤلنده آغری چکیب؟»

لئش اییندن علاوه دول‌لارین سسی ده موزالان ویزیلیتسی کیمی اتاغا دولوب. هر کس اونون اؤلوم تاریخینی تخمین ویریر. اونو نه واخت و هاردا گؤردوکلریندن دئییرلر. شلاله أل آتیر کیتابی اونون أللری آراسیندان گؤتورسون. او آندا نیمتاج همیشه کی کیمی قره بیک خودکار ایله نوت دفتری ألینده بیر سرکرده کیمی ایچری گیریر. دول‌لار قیراغا چکیلیب اونا یول وئریرلر. او ایسه کره‌نئیدن چیخمیش سسینی باشینا آتیر. : «أل ویرمایین، هئش زادا أل ویرمایین....»