کولت.آذ گونئی‌لی شاعیر و یازیچی محمدرضا لوایی‌نین یازیسینی تقدیم ائدیر:

آرتیق آیلار حواسسیمدا دئییل. سسینی آچیرام. آیریلیقدان اوخویورسان. من هر شئیی بوراخماق ایسته ییرم. یازینی، شعیری، میللتی، سیاستی، هر شئیی. آرتیق هئچ بیر شئی حاواسسیمدا دئییل. سسینی آچیرام. آیریلیقدان اوخویورسان.

حسن حرکتیمیز اؤلوب دئییر.
حرکتیمیز دئییل حرکتین بئینی اؤلوب دئییرم.
حسن دئییر: اومودسوزام.
دئییرم: اومودسوزلوقدا بیر حرکت دیر.

ائوئت، اومودسوزلوق بیر یؤنتم دیر. اینسان سوسوز قالماسا سویون قدرین بیلمز.

حسن دئییر: بوراخیرام هر شئیی...

بلکه ده بوراخماق دئییل بوراخیلماقدیر. بوْش وئر. بو گون سایتلارین بیرینه منیم یازیلاریمی پایلاشما یازدیم. سوْن یازیمی قورتارمادان بوراخیب شه هه ره چیخدیم. پیلانیم هر شئیی ترک ائتمکدیر.

حسن دئییر: حرکتی بوراخسان دا حرکت آرخانجا گله جک. منیم آمما آرخام یوخدور آرخایین اول.

هئچ بیر شئی حاواسسیمدا دئییل. باشقا پیلانلاریم وار. هامینی اؤزومدن کوسدورمک، داغا چیخماق، درین نفس چکمک، کهلیک اوتو آرماق، مئشه نین دیبینده اوزانیب اؤلمک، بیر ده، سسینی آچماق.

هئچ بیر شئی حاواسسیمدا دئییل.
سسین هر شئی دیر.
سسینده آیریلیق اولماسایدی ییخاردیم دونیانی...